Wir^a) die botten des hailigen Ro^emischen richs stete Vlme, Costentz, Ezzlingen, Rútlingen, Rotwil, Wile, V´berlingen, Memmingen, Bibrach, Rauenspurg, Lyndow^e, sant Gallen, Kemptun, Koufbúren, Livtkirch, Isny, Wangen, Bůchorn, Gemv´nde, || Halle, Hailbrunnen, No^erdlingen, Dinkelspúhel, Wymphen, Wynsperg, Pophingen vnd Aulun vnd als wir hie nach von wort ze wort verschriben vnd benempt sien V^olr. Bessrer, Hans Ehinger von Maylant¹, V^olrich Blank, || Berchtolt Wiler, Chůnrat Schindely, Ru^edger Livbler, Hans Scho^ellplyn, V^olrich Vngelter, Jacob der Wirt, Hans Lo^eblyn, Cůnr. Go^etzlin, Aulber Behan, V^olrich Greter, Hans Růtzenberger, Wilhalm Maygenberg, Hainrich || Renolt, Hans Widmer², Hans Friburg, Claus Merbolt, Hans Trub, Hans Stosser, Chůnrat von Radwangen³, Marquart Wikken vogt, Haintz Diem, Gerhart Fu^er, V^olr. Ainkúrn, Hainr. Bischof, Hans Sitz, Hainrich Ehinger vnd Hans der Hailer, als wir vff dis zit bi ainander gewesen sien, bekennen vns mit disem briefe, daz wir mit vollem gwalt an aller vnser vorgenanten stete stat mit den vesten vnd erbern hern Ludwigen von Hornstain lantvogt vnserr herren von O^esterrich in Swaben, hern Go^etfrid dem Múller lantvogt in Ergo^ew, in Turgo^ew vnd vff dem Swartzwalt, her Walthern von der Dikke lantvogt in Brisgo^ew, Eberh. von Luphen lantgraue ze Stu^elingen vnd burggraue ze Tirol, hern Chůnr, Schnewlyn schulthaisz ze Friburg, Hansen^b) von Bo^vnsteten vogt ze Kiburg, Hainrich von Randegg vogt ze Schafhusen, Wernhern dem Schenken von Bremgarten vnd Chůnrat von Tanhayn burgermaister ze Vilingen an stat vnd von wegen der durchlúchtigen fúrsten vnd herren hertzog Aulbrehtz vnd hertzog Leopoltz gebrůder von gotz genaden hertzogen ze O^esterrich ze Styr ze Kernden vnd ze Crayn grafen ze Tirol etc. vnserr lieben genedigen herren vnd die den obgenanten zwayn lantvo^egten hern Ludwigen vnd hern Go^etfriden mit iren offnen briefen dar vmbe vollen gwalt enpholhen vnd gegeben hant vmb ainen bunde zwischen in vnd iren landen Elsezze, Brisgo^ew, Sunggo^ew, Argo^ew, Turgo^ew, Kurwalhen vnd Swaben vnd dar zů mit allen den steten dienern herren rittern vnd och knehten, die in den selben iren landen und riuieren begriffen^c) vnd verschriben sint, vnd och vns obgenanten steten gerett vnd geta^edinget haben vnd der bunde och luterlich vnd gantz zůgangen gemachet vnd verschriben ist, wie oder in welher wise man den halten laisten vnd vollfu^eren sol, dar vmbe vnd wan der selbe bund vnd buntbriefe gentzlichen geordnet vnd mit allen artikeln verschriben ist, so haben wir botten alle, als wir vorgenant sien, bi vnsren gůten trvwen gelobt vnd dar nach liplich zů got vnd zů den hailigen gesworn gelert aide mit vfgebottnen vingern, daz wir den selben bunde, wie wir den von der vorgenanten vnserr stete wegen mit in haben vertedingt vnd gemachet, sta^et vnd wa^vr halten vollstrekken vnd vollfu^eren súln vnd wellen in aller der maynung vnd wise, als och der gemachet vnd verschriben ist, a^vn alle arge liste vnd geuerde, vnd daz och wir mit vnsren ra^eten in allen vnsern steten groszen vnd klainen fu^egen fúrdren schaffen vnd werben súln, daz si den bunde och sweren nach dez buntbriefs sage, den wir dar vmbe och gemachet haben, a^vn alle geuerde. Dar zů haben wir den vorgenanten vnsern herren von O^esterrich vnd iren lantvo^egten steten herren rittern vnd knehten in dem namen als da vor sunderlich gelobt versprochen vnd verhaizzen, daz wir in den buntbriefe, den och wir ietzo geordnet verschriben vnd gemachet haben, mit der vorgenanten vnserr stete aller aygnen angehenkten insigln versiglten gantzen vnd gůten in ir gwalt vnd gen Schafhusen in die stat fertigen antwúrten vnd schaffen súln vnd wellen hie zwischen vnd bis ze mitter vasten, die nehst kumpt, a^vn alle geuerde vnd gentzlich a^vn iren schaden, vnd wenne och daz beschiht vnd in der briefe also geantwúrt wirt, so súln si vns disen vnsern briefe och wider antwúrten vnd geben a^vn widerrede. Doch ist vernemlich berett, daz der bunde baidenthalb vff hivt den tage, alz dirr briefe geben ist, an vahen vnd in gantzer maht vnd kraft beliben vnd sin sol, wie der mit na^emlichen worten in dem buntbriefe begriffen vnd verschriben stat, a^vn alle geuerde. Mit krafft vnd vrkúnde disz offnen briefes, den wir in dar vmbe von vnser aller haissentz wegen besiglten geben mit der stat ze Bibrach aygnem angehenkten insigl. Der geben ist dez nehsten samptztags vor sant Valentyns tag, do man zalt nach gotz geburt drivzehenhundert jar vnd dar nach in dem a^vht vnd sibentzigosten jare.

Source Fulltext: Chartularium Sangallense IX, Nr. 5632, S. 311-312.