Ich^a) Ludwig von Hornstain bi den ziten der durchlúchtigen fúrsten vnd herren hertzog Aulbreht vnd hertzog Leopoltz von O^esterr(ich) gebrůder miner genedigen herren lantvogt in Swaben, ich Go^etfrid der Múller der selben miner genedigen herren lantvogt in Érgo^ew, in Tûrgo^ew vnd vff || dem Swartzwalt¹, ich Walther von der Dikke lantvogt in Brisgo^ew, ich Eberhart von Luphen lantgraue ze Stu^elingen vnd burggraue ze Tirol, ich Chůnr, Schneuwly schulthaiß ze Friburg², ich Hans von Bo^vnsteten vogt ze Kiburg, ich Hainr, von Randegge vogt ze || Schafhusen, ich Wernher der Schenk von Premgarten³ vnd ich Cůnr, von Tainhain burgermaister ze Vilingen⁴ veriehen vnd bekennen offenlich mit disem briefe, als die vorgenanten vnser herren baidiv hertzog Aulbreht vnd hertzog Leopolt von O^esterr(ich) vns vorgenanten zwayn || Ludwigen von Hornstayn vnd Go^etfrid dem Múller enpholhen hatt ze tedingen vnd ze reden vmb ainen bunde zwischen in vnd irer lande Elsezze, Brisgo^ew, Sunggo^ew, Argo^ew, Turgo^ew, Kurwalhen vnd Swaben vnd aller irer stete vnd diener herren ritter vnd knehte in den selben iren landen vnd kraissen vnd och dez hailigen Ro^emischen richs stete in Swaben Vlme, Costentz, Ezzlingen, Rútlingen, Rotwil, Wile, Memmingen, V´berlingen, Bibrach, Rauenspurg, Lindow, sant Gallen, Kemptun, Koufbúrren, Livtkirch, Ysny, Wangen, Bůchorn, Nordlingen, Dinkelspúhel, Pophingen, Gemv´nd, Halle, Hailbrunnen, Wymphen, Winsperg vnd Aulun^b) vnd och vns dar vmbe vollen gwalt vnd gantze maht enpholhen vnd gegeben hant mit irem offnen briefe vnd angehenkten insigln, die selben sache gentzlichen ze enden vnd vszetragen, den selben briefe vnd och disen gegenwúrtigen briefe wir den obgenanten steten in geantwúrt vnd durch bezzer sicherhait gegeben haben vmb daz, daz in die sache ze gantzem ende vsgetragen vnd vollfu^ert werde in aller der wise, alz her nach geschriben ist. Wan aber wir zwen aynig die sache a^vn ander vnser herrschafft ra^ete niht verhandlen noch vsrihten wolten, so sien wir alle nivn, als wir vorgenant sien, zů den sachen geriten vnd die holffen verta^edingt vnd ze ende braht, vnd dar vmbe wan denne div sache alz gar ainmůtklich redlichen vnd schleht zůgangen vnd vsgetragen worden ist, so haben och wir alle nivn bi vnsern gůten trvwen gelobt vnd dar nach liplich zů got vnd zů den hailigen gesworn gelert ayde mit vfgebotnen vingern, daz wir den selben bunde, wie wir den an stat vnd von wegen der obgenanten vnserr herren von O^esterr(ich) mit den egenanten steten dez richs haben vertedingt vnd ze ende braht, sta^et vnd wa^vr halten vollstrekken vnd vollfu^eren súln vnd wellen in aller der maynung vnd wise, als och der verschriben vnd gemachet ist, a^vn alle argeliste vnd geuerde. Vnd daz och wir schaffen fu^egen vnd fúrdren súln, daz alle amptlút in allen der vorgenanten vnserr herren stete vnd die in den vorgenanten kraissen vnd landen gelegen sint, den bunde och sweren nach dez bundbriefs sage, den wir dar vmbe gemachet haben, a^vn alle geuerde. Dar zů haben wir den egenanten steten in dem namen als da vor gelobt versprochen vnd verhaizzen, daz wir in den buntbriefe, den och wir ietzo geordent verschriben vnd gemachet haben, mit der vorgenanten vnserr herren baider hertzog Aulbreht vnd hertzog Livtpoltz insigln angehenkten versiglten gantzen vnd gůten in ir gwalt vnd gen Vlme in die stat fertigen antwúrten vnd schaffen súln vnd wellen hie zwischen vnd sant Go^erien tag, der nehst kumpt, a^vn alle geuerde vnd gentzlichen a^vn iren schaden. Vnd wenne och daz beschiht vnd in der briefe also geantwurt wirt, so súln si vns den briefe vnd och den gwalt briefe, den vns die obgenanten vnser herren von O^esterr(ich) gegeben hant, wider antwúrten vnd geben a^vn widerrede. Doch ist vernemlich berett^c), daz der bund baidenthalb vff hivt tag, alz dirr briefe geben ist, an vahen vnd in gantzer krafft vnd maht beliben vnd sin sol, wie der mit na^emlichen worten in dem puntbriefe begriffen vnd verschriben stat, a^vn alle geuerde. Mit kraft vnd vrkúnde ditz briefes, den wir den obgenanten steten dar vmbe besiglten geben mit vnser der vorgenanten Ludwigs von Hornstain, Go^etfrid des Múllers, Walthers von der Dikke, Eberhartz von Luphen, Hansen von Bo^vnsteten, Wernher dez Schenken vnd Chůnratz von Tainhain aignen angehenkten insigln, wan wir die vorgenanten Chůnr. Snewly vnd Hainr. von Randegge vnsriv aigniv insigl vff dis zit bi vns niht heten. Der geben ist dez nehsten samptztags vor sant Valentyns tag, do man zalt nach gotz gebúrt drivzehenhundert jar vnd darnach in dem aht vnd sibentzigosten jare.

Source Fulltext: Chartularium Sangallense IX, Nr. 5631, S. 309-311.