Allen^a) den, die disen brief an sehent oder ho^erent lesen, kúnde ich Cůnrat von Sal schultheis ze Winterthur¹ vnd vergich, das ich ze Winterthur offenlich ze gerichte || sazz, vnd kamen da in gerichte die erbern lúte Albrecht von Lindenberg² an einem tail vnd swester Clara vnd swester Elzbetha von Lindenberg³ klosterfro^vwen || ze Tennikon⁴ sant Bernhartz orden gelegen in Costentzer bystům des egenanten von Lindenberg geswestran an dem andern tail, vnd nach gůtem rate vnd mit gůter || betrachtunge stůnd der obgenant Albrecht von Lindenberg gesunt sinnen vnd můtes dar in gerichte an dem stab vnd nam da mit miner hand gunst vnd gůtem wyllen recht vnd redlich frylich vnd vnbetwungenlich die vorgenemten swester Claren vnd swester Elzbethen von Lindenberg sin swestran ze rechten gemaindern v´ber sin aygen múli gelegen ze Ryed⁵, die ja^erlichs giltet sechs mútte kernen vnd ain phunt gewonlicher Zúricher phenning, mit aller rechtunge vnd zůgeho^erde mit gelerten worten, als gerichte vnd vrtail gab, also mit der bescheidenheit vnd mit dem gedinge, das sú allú drú ainer andre recht gemainderre vnd tailgenossen sin sont v´ber die vorgeschriben múli mit aller zůgeho^erde nach des landes recht sitte vnd gewonheit ane aller menklichs irrunge vnd widerrede. Vnd wan allú die vorgeschriben ding vnd o^vch dú gemainde vor mir beschehen sint mit aller der ehafti vnd sicherheit worten vnd werken, so nach rechte oder von gewonheit deheins wegs dazů gehorte vnd man tůn solte vnd als nach miner frage mit gemainer vrteil vff den eide erteilet wart, so han ich ze offenem vrkúnde der warheit min insigel von des gerichtes wegen offenlich gehenket an disen brief ze einer zúgnúste diser sache. Vnd ze noch merer sicherheit so hant sú erbetten den rat ze Winterthur, daz si ir insigel ze einer zúgnúste diser sache henken an disen brief. Vnd vergehen o^vch wir Wetzel der Schultheis, Otto der Zoller, Hans von Sal, Růdolf Lochli, Hans Steinkelr, Berchtolt Mo^ergelli vnd Hans Lo^eninger der rat ze Winterthur, wan v´ns mit warheit fúrkomen ist, daz allú die vorgeschriben ding vor v´nserm gerichte so recht vnd so redlich beschehen sint, so hant wir durch beider tail bette willen vnsers rates ingesigel ze einer zúgnúste diser gemainschaft gehenket an disen brief. Ich der vorgenant Albrecht von Lindenberg vergich o^vch einer gantzen warheit aller vorgeschribener ding vnd es recht vnd redlich getan han, vnd des ze noch merer sicherheit so han ich min aigen insigel offenlich gehenket fúr mich vnd alle min erben an disen brief. Der geben wart ze Winterthur an dem nechsten dornstag nach sant Erasmus tag in dem jare, do man zalte von gots geburte drútzehenhundert vnd sibentzig jaren vnd darnach in dem achtoden jare.

Source Fulltext: Chartularium Sangallense IX, Nr. 5647, S. 325-326.