Wir der burgermaister der amman der rate vnd alle burger gemainlich der stat ze Lindow¹ tůnd kunt vnd veriehent || offenlich mit disem brief, daz wir mit dem erwirdigen fúrsten v´nserm gna^edigen herren Georien abt dez gotzhus || ze sant Gallen² v´ber ain komen sint, daz wir in ze burger enphangen hant, daz er v´nser burger sin sol fv´nf || iar die nechsten nach enander nach dem tag, alz dirre brief geben ist, mit so^elicher bedingde, daz er v´ns ellú iar ze sant Martis tag ze stúr geben sol sechtzig guldin, die gůt sint an dem gold vnd swa^er an dem gewiht. Vnd waz sto^ezz v´ns angat, ez si von v´nser selbs wegen oder von v´nser aidgenozz wegen, dar inne sol er v´ns beholfen sin nach dem, alz wir in denne anlegent, ez si mit raisent oder mit andern sachen, ane geuerd. Wir súllent im och beholfen sin vngeuarlich gen aller menglich alz ainem andern v´nserm burger ze dem rechten. Wa^er och, daz in ieman anspra^ech, dem sol er rechtes gehorsam sin vor v´nserm rate hie ze Lindow vngeuarlich alz ain ander v´nser burger. Ez ist ouch berett, wa^er daz im burgerrecht nit fůgti, daz mag er v´ns wol absagen, wenn er wil, mit semlichem gedinge, waz stúran sich denne nit ergangen hettind vnd er nit geben hetti, die sol er v´ns denn och gentzlich vsrichten vnd geben inrent den nechsten zwain manoden, die aller schierost koment nach dem absagent, ob er es abseiti. Wa^er och, daz der selb vorgenant vnser herre abt Geori von todez wegen abgieng vnd sturbi vor dem nechsten sant Martis tag oder welez iars nach dem selben nechsten sant Martis tag er abgieng vnd sturbi, daz got lang wend, so sol v´ns danach die nechst stúr von dem iar, alz er denne abgangen ist, vf den nechsten sant Martis tag nach sinem tod denne veruallen sin. Vnd dez allez ze offem vnd warem vrkúnd vnd sta^eter sicherhait geben wir dem vorgenanten v´nserm herren abt Georyen disen brief darúber besta^et vnd besigelt mit v´nser stat ze Lindow gemainem insigel dem mindern. Dis geschach vnd ist dirre brief geben an dem nechsten donrstag nach dem hailgen tag in den winechten nach Cristus gebúrt drúzehenhvndert iar, donach in dem nv´n vnd sibentzigosten iar.

Source Fulltext: Chartularium Sangallense IX, Nr. 5684, S. 349-350.