Allen^a) den, die disen brief an sehent lesent oder ho^erent lesen, kúnd ich Hainrich in der Búnd von Costentz kilchherre ze Wengi¹ vnd vergih || offenlich mit disem brief fúr mich vnd fúr alle min erben vnd nâhkômen, als mir der from man Guntram sailiger von Spiegelberg² || versetzt hatte ze ainem redlichen pfand den erbern kneht Walther Sturzenegg von Wengi, der da gehôrte zů siner vesti || Spiegelberg, vmb zwelf gůter guldin, das da die wolerbornen min gna^edigen herren graf Tonat vnd graf Diethelm von Toggenburg³ gebrůder, die die selben vesti Spiegelberg koft hant, den selben Walther Sturzenegg mit lib vnd mit gůt vnd mit allen rehten von mir vmb die selben zwelf guldin gar vnd gentzlich erlediget vnd erlo^eset hant, vnd darumb so han ich mich mit gůtem friiem willen vnbetwungenlich fúr mich vnd fúr alle min erben vnd nâhkomen in der vorgenanten von Toggenburg vnd in ir erben hand letklich vnd frilichen entzigen, als ich daz durch reht wol solte vnd mohte tůn, vnd verzihe och mit vrkúnd dis briefs gentzlichen vnd gar alles rehten vordrung vnd ansprach, so ich zů dem selben Walther Sturzenegg zů sinem libe ald zů sinem gůt ie hatte gewan ald noch hienah iemer gehaben vnd gewinnen in dehain wis mo^ehti von pfantschatz oder in dehain ander wise, ân geuerd, vnd als ferre wa^er, daz dehain brief darúber geben wa^erint vnd die funden vsgezogen vnd gezo^egt wurdent nv ald hernach, das die selben brief gentzlich tod vnd ab sin sont vnd ainkain kraft noch ma^eht niht haben sont vnd och den vorgenanten von Toggenburg vnd iren erben enkainen schaden noch gebresten niht bringen noch pru^efen sont weder vff gaistlichem noch vff weltlichem gericht noch an dekainen andren stetten, ân alle geuerd. Vnd dez vnd hierúber ze ainer sta^eten sicherren warhait aller vorgeschribener ding vnd gedingde han ich Hainrich in der Búnd da vorgenant min insigel fúr mich vnd fúr alle min erben vnd nahkomen offenlich gehenkt an disen brief. Der geben ist ze Wengi an dem na^ehsten zistag vor sant Hylariien tag, do man zalt von gottes gebúrt drúzehenhundert jar, sibentzig jar, darnah in dem núnden jar.

Source Fulltext: Chartularium Sangallense IX, Nr. 5688, S. 352.