Wir fro Elzbêth die Gielin von Glattburg a^ebtissenn vnd der conuent gemainlich dez closters || ze Maggeno^vw¹ tu^en kunt vnd veriehent offenlich mit disem brieue fúr vns vnd fúr alle vnser || nachkomen allen, die in ansehent lesent oder ho^erent lesen, daz wir vns mit kuntschaft an er||beren lúten, den man darumb billich gelo^vben sol, eruarn habent, daz wir noch vnser gotzhus an Adelhaiten V^olrichs dez Schmitz von Flawille² êlichen wirtinnen Go^etfrid Rienoltz sa^elgen von Burgo^vw³ elichen tohter an ir lip noch an ir gůt weder von aigenschaft noch von lehens wegen enkain reht vordrung noch ansprach hant noch haben sont, vnd darumb so habent wir vns willeklich verzigen vnd verzihent vns mit disem brieue gantzlich vnd gar fúr vns vnd fúr alle vnser nachkomen der vorgenemten Adelhaiten Schmidinen mit lip vnd mit gůt vnd mit allen rehten aller aigenschaft aller lehenschaft aller besatzzung aller gewêr lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so wir oder vnser nâchkomen ald vnser vorgeschriben gotzhus ze Maggeno^vw an der zv^o der vnd von der vorgenemten Adelhaiten Schmidinen lip oder gůt von aigenschaft ald von lehens wegen ie gehept habent ald hie nach iemer gehaben oder gewinnen mo^ehtint, vnd daz wir noch dekain vnser nachkomen noch nieman andre an vnser noch an vnsers vorgeschribenen gotzhus stat noch von vnsern wegen die vorgenemten Adelhaiten Schmidinen ir lip noch ir gůt von aigenschaft noch von lehens wegen niemer súllent noch wellent ansprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Vnd ze vrkúnd der warhait aller der vorgeschribenen dinge vnd vergiht so habent wir die vorgenemt fro Elzbeth die Gielin a^ebtissenn vnd der conuent gemainlich dez vorgeschribenen closters ze Maggeno^vw vnser insigel vnd vnsers conuentes insigel fúr vns vnd fúr alle vnser nâchkomen gehenkt an disen brief. Der geben ist ze Maggeno^vw an dem na^ehsten ma^entag nach sant Agthen tag in dem jar, do man zalt von Cristus gebúrt drúzehenhundert jar, sibenzig jâr vnd darnach in dem núnden jâre.

Source Fulltext: Chartularium Sangallense IX, Nr. 5692, S. 354-355.