Allen^a) den, die disen brief ansehent oder ho^erent lesen, kúnden wir graf Tonad, graf Dietheln von Toggenburg¹ gebrůder grafen ze Bra^etengo^ewe² ze || Thafaus³ vo^egte ze Rapreswil⁴ wir der rat vnd die burger gemeinlich der selben statt vnd veriehen offenlich mit disem brief, das wir gemeinlich vnd || einhelleklich ze rat worden vnd v´ber ein komen sigint, das wir den erbern man Fiflin Juden, Jútten sin wirtinn ir erben vnd ir ingesinde ze burger genomen || vnd empfangen vnd inen burgrecht bi v´ns geben habend, also das inen alle v´nser friheit genade vnd recht bi v´ns behalten sie als v´ns selber an alle geuerde, vnd sol der selb Fifli jude sin wirtinn ir erben vnd ir ingesinde in v´nserm schirme sin vnd si halten vnd inen gewaltes vnd vnrechtes vor sin alz v´ns selber vnd andren v´nsern burgern ane widerrede, vnd sol aber Fifili der jude sin wirtinn ir erben den burgern aller jerlich ze stúre geben sêchs pfund pfenning Zúricher múntz genger vnd genemer. Es sol o^vch Fifli jude sin wirtinn ir erben gůt lichen, ob si gůt ze lihenne hand, v´nserm burger einem ein pfund vmb drij pfenninge ze der wuchen vnd den gesten ein pfund vmb vier pfennige vnd den burgern, was vnder fúnf schillingen ist, vmb ein pfenninge, fúnf schilling vmb ein pfennige vnd was ob fúnf schillingen ist, vmb zwen pfenninge vntz an zehen schilling vnd von zehen schillingen zwen pfennige, vnd was ob zehen schillingen ist, drij pfenninge vntz an ein pfund, vnd von eim pfund drij pfennige, als vor berett ist. Si mugent o^vch wol lihen vff ellú pfand, ob si pfenning hand, ân allein gebrochen kelche, ân na^essi blůtigú tu^echer vnd an la^eder, das in der gêrwi litt. Vnd were o^vch, das inen verstolnú pfender versetzt wurdint, dú sol man von inen wider lo^esen vmb ho^vbtgůt vnd vmb wůcher an alle widerrede. Vnd sol si nieman v´t twingen hier vmb ze sagenne, wer inen dú pfender versetzt habe. Vnd were o^vch, daz Fifli der jude sin wirtinn ir erben ald ir ingesinde dehein pfand verlurint, mugent sie denn swerren, daz si das ir da mit verlorne hand, so sind si vmb das selb pfand denne ledig vnd sol si dar vmb nieman straffen. Vnd were o^vch, daz deheine jude her ka^eme, der ir^b) schůler ir knecht oder jungfro^vwe were vnd ir ingesinde hiessi vnd ir kost a^essi, der selb sol o^vch denne alle friheit gnad vnd recht haben in aller der wise, als si Fifli jud sin wirtin vnd ir erben hand, ân alle geuerde. O^vch mag Fifli jude sin wirtinn ir erben vnd ir ingesinde einest in dem jar ein manod an ir hochtzit varen, alz ir sitt vnd gewonheit ist, vnd sol inen dez nieman vor sin. O^vch ist berett, weles pfand Fifli jude sin wirtinn ir erben ald ir ingesinde nicht lenger mer behalten wend, es sie nach dem lihenne veriaret oder nit, vnd ist daz selb pfand einez v´nsers burgers, dem sond si es einez manodez vorhin kunt tůnt bi v´nser stat geswornen weibel, vnd lo^est er denne sin pfand nicht in dem selben zil, dem es also verkúnt wirt, so mugent si denne dú selben pfand, ir sie eins oder zwei oder mer, wol vmb ho^vbtgůt vmb gesůch an griffe, wie es inen fůgklich ist, vnd hand dar vmb dannenhin nieman nicht ze antwúrtenne. Es mag o^vch Fifli der jude sin wirtin vnd ir erben vf ir pfand wol behaben, was inen dú selben pfand stant, ho^vbtgut ald gesůch. Wir sond o^vch nicht gestatten, das si ieman vmb kein pfen anspreche, vnd dar zů so sont wir o^vch besorgen vnd schaffen, das man inen bi v´ns fleisch schlache nach irem recht in zitlichem bescheidenn ko^vffe, an allen vare. O^vch sol man wússen vmb alle die sachen, so si ze schaffenne hand, daz si dar vmb nieman nicht erzúgen sol noch mag denne mit einem vnuersprochenne ingesessen burger, der cristan ist, vnd mit einem ingesessen erbern Juden oder mit zwein ingesessen Juden, an alle geuerde. Vnde wenne o^vch der egenant Fifli jude sin wirtinn oder ir erben vnd ir ingesinde von v´ns varen wend, das mugent si wol tůn mit ir lib vnd gůt, wenne inen daz fu^egt vnd wol kunt, vnd sond in v´nserm geleit varen zwo mile wêgs von v´nser stat, war si wellent, vnd sond o^vch wir sicher geleiten vnde bringen mit ir lib vnd gůt, da hin si denne wellent vnd si v´ns ermanent, an alles sv^men vnd ane alle widerre^c) vnd ane geuerde. Vnd dez ze einem waren stetten vrkúnde so haben wir graf Tonad vnd graf Dietheln von Toggenburg gebrůder ietwedre sin insigel offenliche gehenkt an disen brief. Vnd ze einer meren sicherheit so haben wir die vorgenanten der rate vnd die burger gemeinlich ze Rapreswil der selben v´nser stat insigel fúr v´ns vnd v´nser stat nachkomen offenlich gehênkt an disen brief. Der geben ist an dem nêchsten zistag vor sant Valentis tag in dem jar, do man zalt von gottez gebúrt drúzehenhundert vnd sibentzig jar vnd dar nach in dem nv´nden jar.

Source Fulltext: Chartularium Sangallense IX, Nr. 5693, S. 355-356.