Wir^a) Chůn von gottes gnâden besta^eter abt dez gotzhus ze sant Gallen¹, das ân alles mittel zů geho^ert dem stůl ze Rome, sant || Benedichten ordens in Costentzer bystum veriehin vnd tun kunt offenlich mit disem brief allen, die in an sehent lesent oder ho^erent lesen, das || wir ze den hailigen gesworn habin ainen gelerten aide mit worten, daz wir die statt ze Wil², die v´nsers gotzhus aigen ist, noch die || lút, die darinne sesshaft sint, ir lib noch ainkain ir lút noch gu^eter dem vorgeschriben gotzhus niemer súllen entpfro^emden noch enpfu^erren in dekain wis vnd das wir och die selben von^b) Wil ir lib noch ainkain ir lút noch gu^eter hinnenhin niemannen erloben so^ellin an ze griffenn weder mit brieuen noch gelúbd noch mit ainkainen andren sachen. Wir veriehent och bi dem selben aide, das wir die vorgeschriben statt noch lút noch gu^eter, als vorgeschriben stat, nút versetzt noch verkúmbert habin da hêr sid dem anfang v´nser herschaft. Wir so^ellin och die selben statt niemannen enpfelhen, dem die burger, die zů der statt ho^erent, mit aiden warten so^ellin, won ainem, der des selben gotzhus ist. Vnd wa der selben v´nser statt ze Wil burger dehainer gefangen oder geno^etet wurdin scha^edlich fúr v´ns oder fúr v´nsers gotzhus gúlt, die als offenber ist vnd als redlich, das wir der gúlt nit logenn oder darumb reht verspra^echint vff dem land vff rittern vnd vff knehten, den sont wir lo^esen ân allen schaden. Wa^er aber, daz sú darúber ieman angriff, dauor so^ellin wir sú getrúlich schirmen, vnd sú v´ns darzů geholfen, ân alle geuerd. Was wir och zů dekainem von Wil ze sprechenn gewinnen, da sol v´ns ains rehten benu^egen vor v´nserm schulthaissen ze Wil, als vntz hêr sitt vnd gewônlich gewesen ist, vnd sont in fúrbas mit ainkainen andren gerichten niht vf triben. Och haben wir der selben v´nser statt vnd den burgern ellú irú reht vnd gůten gewônhaitten vnd gesetzten besta^etet, die si von v´nsern vordern hant gehebt mit verschribner veriehnust oder mit redlicher gelúbd, vnd so^ellint och die burger in der selben statt nvwent ainost in dem jar stúran nach zimlichen vnd gewonlichen dingen. Vnd ze warem vrkúnd der vorgesaiten dingen vnd gesetzten so henken wir v´nser insigel an disen gegenwúrtigen brief. Der geben ist ze Wil in v´nser vorgesaiten statt an dem na^ehsten mentag vor sant Margretun tag in dem jar, do man zalt von gottes gebúrt drúzenhundert jar, sibentzig jar, darnah in dem nunden jar.

Source Fulltext: Chartularium Sangallense IX, Nr. 5725, S. 394.