[Allen den,]^a) die disen brief an sehent oder ho^erent lesen, kúnde^b) Hans Blatter vnd vergich ofenlich an disem brief, alz ich ze Rapreswile¹ gefan||gen waz von red wegen, so v´ber mich gelôffen waz oder wâr vmb ich geuangen waz, alz ich da ledig vnd los bin worden mit hilf vnd || rât miner frúnden vnd ander erbrer lúten also vnd mit semlicher bescheidenheit, daz ich willeklich vnd vnbetwungenlich offenlich ze den || heilgen gesworn han einen gelerten eyd mit miner liplichen vfgehepten hand, von der getât vnd geuangenschaft wegen vmb red vnd werch menlichs frúnd ze sine vnd sunderlich der statt vnd der burger gemeinlich ze Rapreswile vnd wer zů inen geho^ert vnd o^vch miner herren lúten von Toggenburg vnd daz niemer mer ze a^eferren noch ze anden weder mit geistlichen noch mit weltlichen gerichten noch ane gericht noch mit keinen sachen worten noch werchen noch nit schaffen getân werden weder mit frúnden noch mit mâgen noch mit nieman von minen wegen. Vnd darzů so sol ich bi dem selben eyd, alz ich hier vmb gesworn han, zwo mile wegz verre von Rapreswil der statt gan vnd in den kreis niemer mer komen in zwein milen. Were aber, daz ich der vorgenant Johans Blatter diz an deheinen stukken vnd sachen, alz vor geschriben stât, mit worten ald mit werchen brech v´ber fu^er vnd nit stet hetti ane alle geuerde, wa man mich denn in den vorgenanten zwein milen an kunt vnd ergriffen wurde, so sol ich ein verzalter man heissen vnd sin vnd sol man mich denne von dem lib tůn ane a^ellú gericht alz ein semlichen man, der verschult hât, daz man in billich von lib tůn sol, vnd sol mich denn mit namen hie vor nút schirmen kein gericht geistlichs noch weltlichs kúng recht keyser recht stett recht herren recht kein fryheit lantfrid noch lantrecht kein gesetzte noch buntnúst kein ander schirme noch fúrzug vnd mit namen kein ander schlacht sach, so ieman erdenken mo^echt, daz mich hie vor mo^echt schirmen. Vnd dez ze einem waren vrkúnd vnd gantzer sicherheit allez dez, so von mir an disem brief geschriben stât, daz es also wâr vnd stet sye vnd belibe nu vnd hie nach, wan ich dien der obgenant Hans Blatter eigens insigels nit han, so hab ich erbetten den fromen wolbescheiden junkherren Wernhern Turner vsserm Tal², daz er sin insigel fúr mich offenlich gehenkt hett an disen brief, dar vnder ich mich willeklich binden in dirre sach. Dez ich Wernher Turner vergich, daz ich min insigel durch Hans Blatters ernstlichen bett wegen offenlich gehenkt han an disen brief mir vnd minen erben vnuergriffenlich vnd vnschedlich. Dirre brief ist geben an dem nechsten zinstag vor sant Martis tag in dem jar, do man zalte von gottez gebúrt drúzehenhundert vnd sybentzig jar vnd dar nach in dem núnden jare.

Source Fulltext: Chartularium Sangallense IX, Nr. 5748, S. 417-418.