Ich^a) Jacob von Vrsin ain frie lantrihter in der graufschaft ze Maurstetten¹ von des hochgeborn dúrhlúhtigen fúrsten wegen hertzog Fridrichs von gottes gnaden pfallentzgrauff bi Rin vnd hertzogen in Baigern² tůn kunt mit di^esem brief allen den, die in an sehent oder ho^erent lesen, das an dem tag, als dirr brief geben ist, || do ich ze Memmingen³ offenlichen ze lantgeriht saz, fúr mich vnd fúr offen verbannen lantgeriht kom dú ersamen edel frow frow Ann von Eierbach des Iteln saeligen tohter von Elerbachs ritters⁴, die ze disen ziten hern Hansen von Rischach ritters⁵, den man nement Flachen, elichú wirtin ist, vnd bat ir ainen fúrsprechen geben, || der ir och erlobet wart, do nam si ze fúrsprechen Alber Behen burger ze Memmingen, vnd mit dem selben irn fúrsprechen sprach si also, si waer ze raut worden mit irn frúnden vnd mit andern lúten, wan si zwaigerlay elicher kind hettin, da von wo^elt si dú selben irú elichen kind von an ander enschaiden mit irm gůt, das si nach irm tod nit || sto^ezzig w^ordin, vnd was ir mainung, das si irm vorbenanten elichen wirt hern Hansen von Rischach ze sinen lebtagen vnd nach sinem tod irm kint dem A^ennlin, das si bi im ha^at, vnd ob si it mer kind bi im gewúnne, vnd der selben kint lib erben vnd waslib erben von den selben lib erben kumt, ir si vil oder wenig, machen fu^egen vnd schaffen wo^elt nach irm tod die vest Kempnat⁶ vnd was darzů geho^ert, als si hie nach lutbaeren wo^elt, so wo^elt si denn irn kinden vom Stain geben vnd schaffen irn tail vnd ist an der vestin ze Klingenstain⁷ vnd was darzů geho^ert, als si och hie nach wo^elt lutbaeren, vnd bat eruaren an gmainer vrtail, wie si^b) das tůn vnd vollfu^eren mo^eht vnd so^elt, als reht waer vnd als es kraft vnd maht hett. Darvmb wart ertailt mit rehter vrtail, das si ainen vogt neimi vor lantgeriht vnd das si der selb ir vogt ze drin maulen von dem lantgeriht fůrti vnd si fraugti vf des richs strauzz, ob si das willenclichen vnd vnbetwngelichen taet, vnd seit si denn ze drin maulen vor lantgeriht vf den aid mit irm vogt, das si es willeclichen vnd vnbetwngelichen taet, was si denn also verschu^eff oder mahti mit irm vogt vnd in min des vorbenenten lantrihters hant breht von lantgerihtz wegen vnd ich das denn von lantgerihtz wegen in der gewalt vnd hant brecht, dem si es also verschúff oder mahti, das hetti gůt maht vnd kraft, vnd also nam si vor lantgeriht ze vogt willenclichen nach erbrer lút raut irn lieben vettern hern Hainrich von Elerbach genant Wolff, vnd der fůrt si ze drin maulen vor dem lantgeriht vnd fraugt si vf^c) des richs strauzz, ob si das willeclich vnd vnbetwngelich taet. Do kom si als dikk wi^eder fúr lantgeriht vnd seit vf irn aid mit irm vorbenenten vogt, si taet das willeclich vnd vnbetwngelich, vnd dar nach mäht vnd schaffet dú selb frow Ann von Elerbach nach irm tod dem vorbenenten irm lieben elichem wirt hern Hansen von Rischach genant Flach ze sinen lebtagen vnd nach sinem tod irm kind dem A^ennlin, das si bi im haut, vnd ob si it mer kint bi im gewún oder gewinnet, ir si ains oder mer knab oder to^ehter, vnd der selben kint liberben vnd was lib erben von den selben lib erben kumt, der si vil oder wenig, die vest, dú genant ist Kempnat mit aller zů geho^ert vnd dú lehen ist von dem hailigen Ro^emschen rich, vnd das dorff ze Appfeltrank⁸ vnd das wiler ze Gennachůsen⁹ mit aller zů geho^ert vnd das lehen ist von Baigern, die vogti ze V´rsin vnd dú lehen ist von grauf Růdolff von Muntpfort ze Veltkirch¹⁰ vnd irn zol ze Lindow¹¹, der ir pfant ist och von dem hailigen Ro^emschen rich, als si das alles ererbt ha^vt von irm o^ehen hern Hansen von Rammenswag¹² saeligen, vnd och was zů dem allem geho^ert an lehen an kirchensatz an vogtrehten an lúten an gůten, es sien an burg an burgstal an burgrehten an berg an graten an vorhof an bw^o an do^erffern an do^erffrehten an ehaeftin an gerihten an twingen an beinnen an espan an gmaind an hu^esern an ho^efen an hofstetten an garten an búnden an selden an zinsen an gelt an holtz an holtzmark an veld an aekkern an wisina an bru^elen an wasser an wasser laittin an múlin an múlstetten an múlrehten an vischentzen an wigern an sewen an waid an trat an wittin an stegen an wegen an straussen an zwi an wasen oder wie das alles genant ist oder gehaissen ob erd oder vnder erd besůchtz vnd vnbesůchtz, es si benent an disem brief oder vnbenent, das alles sol der vorbenent herr Hans von Rischach nach der selben siner husfrowen tod, wenn si von tods wegen abgengangen ist, das got lang behút, haben vnd niezzen mit allen nútzen diensten gúlten vnd rehten, wie die genant sint, ze sinen lebtagen alle die wil er lebt ru^ebeclich a^vn all an sprach bekúmbernúss vnd beswaernúss aller andrer irr erben vnd nach sinen tod das vorbenent sin kint das A^ennlin, vnd ob dú selb sin vorbenent husfrow it mer kind bi im gewinnet vnd der selben kint lib erben vnd was liberben von den selben liberben kumt, der si uil oder wenig, in aller der wis, als vorgeschriben sta^vt, a^vn all widerred. Waer aber, das dú selben kint aellú vnd ir lib erben von tod abgiengin a^vn liberben, so sol dú obgenant vestin Kempnat mit aller zů geho^ert dar zů Appfeltrank, Gennachusen vogti zol lehen kirchen satz vogtreht lút vnd gůt, wie das genant ist vnd als hie vorgeschriben sta^vt, nach der vorbenenten fro^vw Annen von Elerbach vnd irs elichen wirtz hern Hansen von Rischach tod, das got lang behút, gentzlichen vallen an der vorbenenten frow Annen von Elerbach kint Burkart, Berhtolden vnd Cůnrat vom Stain, dú si hett bi irm erren elichen wirt saeligen hern Berhtold vom Stain von Klingenstain, den man hiess den halb ritter, vnd an der selben kint lib erben vnd der selben liberben kint, der si uil oder wenig, vnd also brauht dú vorbenent frow Ann von Elerbach mit irm vorbenenten vogt die vorbenent vest Kempnat mit aller zů geho^ert vnd dar zů aellú vorgeschriben gůt lehen kirchen saetz vnd vogtreht, als si hie vor benent sint an di^esem brief mit allen irn zů geho^erden, wie die genant sint, in min des vorbenenten lantrihters hant von lantgerihtz wegen, wie reht ist vnd als da ertailt wart in gemaeht wis. Do brauht ich der selb lantrihter das alles von lantgerihtz wegen in gemaehtes wis nach der obgenanten frowen tod in des selben hern Hansen von Rischach gewalt vnd hant ze sinen lebtagen alle die tag vnd er lebt vnd nach sinem tod in sines kindes des A^ennlis vnd ob dú selb frow it mer kind bi im gewinnet vnd der selben kint liberben vnd der selben liberben kint, die von dem Stain koment oder komen múgent, gewalt vnd hant zehabent vnd zeniessent lút vnd gůt mit allen irn zů geho^erden, wie die genant sint, in aller der wis, als vorgeschriben sta^vt, a^vn aller maenclichs irrung. Dar nach gieng och ze maul fúr lantgeriht die vorbenenten Burkart vnd Berhtold vom Stain vnd verzigen sich och willenclichen vnd vnbetwngelich in min des vorbenenten lantrihters hant von lantgerihtz wegen fúr sich vnd fúr irn brůder Cůnrat vom Stain vnd fúr all ir erben der vorbenenten vest ze Kempnat mit aller zů geho^ert dar zů Appfeltrank, Gennachusen vogti zo^ell lehen kirchensa^etz vogtrehtz lút vnd gůt mit aller zů geho^erden^d), die dar zů geho^erent, wie die genant sint, als vorgeschriben sta^vt, willenclichen mit ir frúnd raut vnd willen, der och etwieuil da vor lantgeriht ze gagen stunden, vnd versprachen da offenlichen, das si vnd der selb ir brůder Cůnrat vom Stain oder ir erben noch niemand anders von irn wegen die vorbenent ir můter noch irn stúff vatter hern Hansen von Rischach noch ir kint das A^ennlin oder ob ir můter it mer kind bi dem selben hern Hansen von Rischach gewinnet vnd der selben kint liberben vnd was kint von den selben lib erben kumt, der si uil oder wenig, an der vorbenenten vest ze Kempnat mit aller zů geho^ert vnd an allen vorgeschriben gůten lúten vnd lehen mit allen irn zů geho^erden, wie die genant sint vnd als hie vorgeschriben sta^vt an di^esem brief, nimmer mer geirren noch bekrenkken so^eltent noch mo^ehtent weder mit gaistlichem noch mit weltlichem gerihten noch mit dehainen sachen in all weg, vnd wenn ir brůder Cůnrat ze sinen tagen kumt, so súlnt si mit im schaffen darnah, so es geuordrot wirt vnd er ze sinen tagen komen ist inner den naehsten zwain manoden vnuerzogenlichen, das er sich des och also verzihet vnd versprichet, wie es denn notdúrftig ist, was hie vorgeschriben sta^vt. Waer aber, das dú kint, die ir můter bi dem vorbenenten hern Hansen von Rischach ha^vt vnd noch gewinnet in aller der wis, als vorgeschriben sta^vt, aellú von tods wegen abgiengi a^vn libs erben vnd als hie vor benent ist an disen brief, das got behút, so sol dú vorbenent vest Kempnat mit aller zů geho^ert vnd aellú vorgeschriben gůt lút lehen kirchen satz vnd vogtreht mit allen irn zů geho^erden, wie das genant ist vnd als hie vorgeschriben stat, gentzlichen vallen an die vorbenenten Burkart, Berhtold vnd Cůnrat vom Stain vnd an ir lib erben, als vorgeschriben sta^vt, nach ir můter vnd irs stúff vatters tod, als vorgeschriben sta^vt, vnd die súlnt denn die vorbenent vestin ze Kempnat mit aller zů geho^ert vnd dar zů aellú vorgeschriben lút vnd gůt, wie das genant ist, als vorgeschriben sta^vt, mit allen irn zů geho^erden ledigen vnd lo^esen von Cůnrat von Rischach des vorbenenten hern Hansen von Rischach brůder vnd von sinen liberben, ob er liberben la^vt, mit zwain tusent gůten guldinen, wan der selb herr Hans vnd Cůnrat von Rischach die selben zwai tusen guldin vormauls dar uf geleit ha^vnt vnd bewendet, vnd alle die wil das mit den selben zwain tusent guldinen nit abgelo^est wirt noch ist, so sol der selb Cůnrat von Rischach vnd sin lib erben die vorbenente vest ze Kempnat mit aller zů geho^ert vnd dar zů aellú vorgeschriben gůt lehen kirchensaetz vnd vogtreht, wie das genant ist, mit allen irn zů geho^erden, als vorgeschriben sta^vt, inn haben vnd niezzen als lang, bis das also gelo^est wirt. Vnd v´ber das alles begert do der vorbenent herr Hans von Rischach im vnd sinen kinden vnd irn liberben vnd was kind von den selben lib erben kumt, als vorgeschriben sta^vt, ains briefs von lantgerihtz wegen mit des lantgerihtz insigel vnd mit der obgenanten siner elicher husfrowen vnd irs vogtz Hainrichs von Elerbachs genant Wolff vnd ir su^en Burkartz vnd Berhtolds vom Stain insigeln, vnd der selb brief ward in och ertailt mit vrtail vnd mit dem rehten. Des ze vrkúnd so ist in dirr brief geben von lantgerihtz wegen besigelt mit des lantgerihtz insigel vnd mit der andern vorbenenten insigel, dú aellú dar an hangent, vnd wir dú vorbenenten frow Ann von Elerbach, Hainrich Wolff von Elerbach ir vogt, ich Burkart vnd Berhtold vom Stain ir su^en veriehen och mit di^esem offenn brief, das wir all vorgeschriben sach geta^vn vnd vollfúrt haben vor lantgeriht ze Memmingen, als reht ist vnd ertailt wart, willeclich vnd mit wolbedahtem můt gesundes libs vnd můtes nach v´nsrer frúnd raut in aller der wis, als vor ist geschriben. Vnd des ze vrkúnd haben wir v´nsrú aignú insigel zů des lantgerihtz insigel gehenkt an disen brief. Der geben ist vor lantgeriht ze Memmingen an dem naehsten fritag nach us geinder osterw^ochen, do dú zal was von gottes gebúrt drúzehen hundert iaur vnd in dem ahtzgostem iaur.

Source Fulltext: Chartularium Sangallense IX, Nr. 5778, S. 445-448.