Wir graf Donat von Tokkenburg¹ graf ze Brettengo^e2 vnd ze Thafaus³ tůnt kunt offenlich mit vrkúnd diss || briefs allen den, die in an sehent lesent oder ho^errent lesen, daz wir an gesehen habint den getruwen dienst, || so vnser lieben getruwen Bertolt Moritzi, Hainrich Lo^es vnd Fyd Klo^ezzin des selben Hainrichs Lo^esen elicher wirtin || a^ellú drú burger ze Merspurg⁴ vns vnd vnsern brůdern da her dik getan hant vnd noch in kúnftigen ziten wol tůn mugint, dz wir inan dar vmb mit vorbedahtem můt gelihen habint vnd lihent inan och wissentlich mit disem brief den zehenden ze Taysendorf⁵ Ba^etzinen gůt genant, dz wilunt V^olrichs Renners statammans iro gůten frúndes was, der selb zehend von vns lehen ist, vnd habint inan allen drin den selben zehenden gemainlich gelihen mit allen rehten núzzen gewonhaiten vnd zů geho^erden, dz sú allú drú die selben lehen vnd zehenden gemainlich inne han vnd niessen sond vnd mugint nach landez lehens vnd gemaindes reht, doch mit den gedingen, dz wir wellint vnd mainent, dz Bertolt Moritzi vnd sin erben, ob er enwa^er, des selben zehenden mit allen núzzen vnd zůgeho^erden zwen tail haben vnd niessen sond, vnd Hainrich Lo^es vnd Fyd sin elicher wirtin vnd iro erben, ob sú enwa^erint, ain dritten tail des selben zehenden mit allen núzzen vnd zůgeho^erden haben vnd niessen sond. Wir hant och von besundern gnaden der vorgenanden Fyden die genad getan vnd tůnt si ir wissentlich mit disem brief, dz si die vorgenanden lehen vnd zehenden inne han vnd niessen sol vnd mag in aller wise vnd rehten, als ob si knapp oder man wa^ere, vnd habint och die lenschaft gen inan getan vnd vollfu^ert mit aller ehafti hantvesti worten werchen ra^eten vnd geta^eten, so dar zů gůt núzze vnd notdurftig warent vnd dar zů geho^ert von reht vnd gewonhait. Vnd des ze vrkúnd vnd ze merer sicherhait aller vorgescribner ding vnd geding hant wir graf Donat von Tokkenburg da vor genant vnser insygel offenlich gehenket an disen brief. Der geben ist ze Spiegelberg⁶ in vnser vesti an dem na^echsten dunstag vor sant Johans tag ze súngihten in dem iar, do man zalt von Cristuss gebúrt drúzehenhundert iar vnd dar nach in dem ahtzigosten jare.

Source Fulltext: Chartularium Sangallense IX, Nr. 5793, S. 460.