Allen^a), die disen brief ansehent oder ho^erent lesen, kv´nden wir Eglolff der Blarrer, Johans vnd Albreht min sún burger ze Costentz vnd vergehint des || offenlich mit disem brief vmb den hoff ze Albisperg gelegen vnd vmb den zehenden ze Albisperg^b) gelegen, der ôch darzů geho^ert, die lehen sint || von dem erwirdigen hoherbornen v´nserm gna^edigen herren abt Kůn des gotzhus ze sant Gallen, so wir dem wolbeschaiden manne || Hugen Schůlmaister burger ze sant Gallen vnd allen sinen erben vnd nachkomen fúr v´ns vnd alle v´nser erben vnd nachkomen ze koffent geben habent, den wir im och vertigen vnd vffgeben soltent vor dem egenanten v´nserm gna^edigen lehenherren. Vnd won aber das nv ze disen ziten nit komenlich getân noch vollefu^ert mag werden, so haben wir v´ns des doch gen dem selben Hugen Schůlmaister vnd gen allen sinen erben vnd nachkomen fúr v´ns vnd fúr alle v´nser erben verbvnden vnd gelobt, wenne das ist, das die von sant Gallen gen dem egenanten v´nserm lehenherren ze hulden vnd gnaden koment, das er in lehen lihen wil, vnd wenne wir danne darúber von im ald von sinen erben, ob er enwa^ere, ald von ir botten darúber ermant werdent ze hus ze hof mit briefen ald vnder ôgen, so so^elint wir inen den egenanten hoff vnd den zehenden, so darzů geho^eret, ze Albisperg mit aller zůgeho^erde vor dem lehenherren vnuerzogenlichen vertigen vnd ze sinen handen vffgeben darnach inrent dem na^ehsten manot. Tu^egint wir des nit, so sont im dis nach benempten búrgen svnderlichen darvmb haft vnd gebvnden sin ze laistent, als hie nach geschriben stât, vntz im die vertgvng vor dem lehenherren vollefu^ert vnd getân wirt. Vnd darvmb daz der selb Hug der Schůlmaister des dester sicher vnd gewisser si, das es im vollefu^ert werde, so haben wir im darvmb ze merer vnd besser sicherhait ze rehten búrgen zů v´ns geben vnd gesetzet Hainrichen von Roggwille¹ den eltern vnd Hainrichen den Blarrer, Gerwiges sa^eligen des Blarrers svn burger ze Costentz. Die selben búrgen hant im baid gelobt vnd ir ietwedre besvnder mit siner trúwe an aines aides statt, wenne si nu hinnenhin von dem egenanten Hugen Schůlmaister ald von sinen erben, ob er enwa^ere, ald von iro botten darúber ermant werdent, es si ze hus ze hoff mit briefen ald vnder ôgen, so sont si sich baid vnuerzogenlich gen Costentz in die statt in antw´rten vnd da reht giselschaft an offenn wirten vsserthalb ir húsern in ander offenner gastgebner wirtes húser ze vailem koff vnuerdinget reht giselschaft ane alle geuerde laisten ir ietwedre besvnder ie zwai mal an dem tag. Wedre aber des nit tv^on wil noch mag, den sol doch des dekain a^endrú giselschaft da vor nit schirmen vnd sol och dawider nit sprechen noch ze wort haben, won das er ainen offenn wirt ze Costentz v^ff sin selbs schaden gewinnen sol, da der obgenant Hug Schůlmaister ald sin erben oder ir bott ainen gisel hin ze gisel legint, der ane geuerde o^vch ie zwai male an dem tag laist vnd als túr kom, als ob der, der den wirt gewnnen hât, mit sin selbs lib da laisti. Vnd sont och die selben búrgen oder die gisel an iro statt also vngeuarlich laisten vnd da von niemer gelâssen won mit des selben Hugen Schůlmaisters gůten willen, e das im dú egenant vertgung vollefu^ert wirt ald sinen erben, ob er enwere. Gieng im ôch der búrgen dewedre ab von todes wegen ald von andren dingen ald das er von dem lande fu^er, so so^elin wir im ie ainen andern búrgen als gewissen ane geuerde an des abgangen statt setzen vnd geben darnach inrent den na^ehsten vierzehen tagen, so wir darvmb ermant werdent, ald der ander búrg sol laisten, als vor geschriben stât, vntz wir im den búrgen ie berihtint. Wir habent och alle drie fúr v´ns vnd v´nser erben die selben búrgen gelobt von allem schaden ze lo^esent, wie si von dirre búrgschaft vnd laistvng wegen ze schaden koment, ald ir erben, ob si enwerint. Vnd ze warem vrkv´nd aller dirre ding geben wir die obgenanten Eglolff Blarrer, Johans vnd Albreht sin sv´n vnd och wir die||
búrgen alle fv´nff v´nsrú insigel an disen brief. Der ist ze Costentz geben, do man von||
Cristes gebúrte zalt drúzehenhvndert jar, darnach in dem ahtzigosten jar, an sant Otilyen||
abent der hailgen magt.

Source Fulltext: Chartularium Sangallense IX, Nr. 5817, S. 474-476.