Ich^a) Hans der Ga^essler ze den ziten stat amman ze Marchdorff¹ vrkúnd vnd vergich || offenlich mit disem brief, daz ich offenlich ze geriht saz hie ze Marchdorff an || dem na^ehsten sunnentag nach v´nser frowentag ze mittem o^vgsten. Do kam fúr mich || herr V^olrich Maygenberg ain priester vss der Ow² aller na^echst bi Ravenspurg³ gewisser bott dez ersamen gaistlichen dez abts vnd dez convents gemainlich dez gotzhus vss der jetzgenanten Ow mit sinem fúrsprechen Bentzen dem Schwitzer, vnd do klegt der selb herr V^olrich Maygenberg zů aim val, den da Geori von Merspurg⁴ amptman dez erwirdigen gaistlichen dez abts vnd dez convents gemainlich dez gotzhus von sant Gallen von dez selben gotzhus wegen ingenumen gehaimot vnd och gevallot hett von Margareten der Otingerinen sa^eligen, vnd sprach och der selb herr V^olrich Maygenberg, diu jetzgenant frow Margaret diu O^etingerin sa^elig gehorti mit dem lib an daz obgenant gotzhus in die Ow, ob im denn nit billich vnd och von recht der selb val von der selben frowen werden vnd och volgen so^elt. Da stůnt der obgenant Geori von Merspurg mit sinem fúrsprechen Haintzen Martinn vnd vnderrett daz alzo vnd sprach, diu obbenemt frow Margaret diu O^etingerin sa^elig geho^erti mit dem lib an daz egenant gotzhus von sant Gallen, ob im denn nit billich der selb val von der selben frowen beliben so^elt. Do erkanten sich die burger gemainlich vnd erteilten och mit gesamnoter vrtail, daz der obgenant herr V^olrich Maygenberg an sins gotzhus stat bewisti mit den na^ehsten můter ma^vgen, daz diu obgenant frow Margaret diu O^etingerin sa^elig mit dem lib an daz egenant gotzhus in die Ow gehorti, vnd daz tett och er, vnd alzo behůb vnd besatzt er mit den na^ehsten můter ma^vgen diu obgenant frowen nach dem rehten, alz im ertailt ward vnd och alz ez billich vnd von recht kraft vnd maht haben sol vnd mag jetz vnd hienach, daz sin vnd waz von ir kumen ist vnd och noch her nach von iren kinden kumpt, mit dem lib an daz obgenant gotzhus in die Ow geho^erti vnd och v´mmer mer geho^eren sol. Vnd dez ze ainem warem vnd offem vrkúnd vnd sicherhait so ha^vn ich der obgenant Hans Ga^essler min aygen insigel offenlich gehenkt an disen brief mir selber a^vn schaden, der och dem egenanten herr V^olr(ichen) Maygenberg von dem geriht ertailt ward. Geben ze Marchdorff an dem obgeschribenn tag in dem jar, do man zalt von Cristus gebúrt driuzenhen hundert jar, dar nach in dem ainn vnd ahtzigosten jar.

Source Fulltext: Chartularium Sangallense IX, Nr. 5863, S. 527-528.