Wir^a) dise her nach geschribnen dez heyligen Romischen richs stete Auspurg, Vlme, Costentz, Ezzelingen, Rútlingen, Rotwile, Wile, V´berlingen, Memmingen, Bybrach, Rauenspurg, Lyndow^e, sant Gallen, Phullendorff, Kempten, Koufbúrren, Livtkirch, Ysny, Wangen, Bůchorn, Gemunde, Halle, Heylbrunnen, Wymphen, Winsperg, || No^erdlingen, Dinkelspúhel, Rotenburg vff der Tuber, Giengen, Pophingen, Aulun, Wile in Turgo^ew vnd Bůchow^e bekennen vns vnd veriehen offenlich mit disem briefe allen den, die yn an sehent oder ho^erent lesen, als wir vns mit den erbern vnd wisen den reten vnd burgern gemeinlichen der stette Mentze, Strausburg, Worms, Spyre, || Frankenfurt, Hagnow^e, Wissenburg vnd Phedersheyn dem heyligen Romischen riche ze eren dem lande vnd vns ze nutze vnd ze frumen verbunden haben vnd einmu^etig worden syn nach der briefe¹ sage, die wir einander dar v´ber vnder vnser stete insigeln versiglt vnd gegeben ha^vn, versprechen wir vns besunderlich in disem briefe || vnd geloben yn gůten trvwen by den eyden, die wir in dem vorgenanten verbunde geta^vn haben, wer es sache, daz yemant, wer der were, die vorgenanten stete samentlich oder besunder von dem verbunde, den sy vnd wir mit einander haben, entrennen oder dar an no^etigen wo^elte, in weih wege daz were, so sollen vnd wellen wir yn da wider getruwlichen vff die eyde geraten vnd beholffen syn a^vn alle geuerde. Wann aber in dem vorgenanten verbunde vnd einmu^etikait yeglichiv der vorgenanten stete besunder vsgenomen haben nach lute vnd vswisunge dez houptbriefs dez verbunds, den wir von yn haben, so verbinden vnd versprechen wir vns och in disem briefe vff die eyde, also wer es sache, daz der dehainer ir ainer oder mer, die sie in dem vorgenanten verbunde vnd ainmu^etikait besunder vsgenomen haben, wider der vorgenanten stete dehaine, die sye vsgenomen hant, teten oder mit den selben steten kriegent oder zweyende wúrden, in welhen wege daz were, vnd daz der ra^vt oder rete oder daz merer teyle vnder yn, die die selben also kriegeten oder schedigten, erkanten^b) vff ir eyde, daz yn von dem oder den, die si vsgenomen hant, vnreht gescheche, so mugen die vorgenanten stetde samentlich mit yn oder der merer teyle vnder yn vns wol manen, vnd súln wir yn danne wider die selben getrúwelichen gera^vten vnd beholffen syn in aller der masze, als ob der oder die in dem verbunde niht vsgenomen wa^eren vnd nach dez vorgenanten verbunds ho^vptbriefe sage, den sy von vns dar v´ber hant, a^vn alle geuerde. Mit vrkunde ditz briefes, dar an wir vnser stetde aller aigniv insigl offenlich gehenkt haben. Der geben ist ze Spyre, do man zalt nach Cristus geburt drivzehenhundert jar vnd dar nach in dem ainen vnd ahtzigostem jare, dez nehsten mentags vor sant Johans tag dez To^euffers, als er geborn wart, genant zu latine nativitas Johannis Baptiste.

Source Fulltext: Chartularium Sangallense IX, Nr. 5848a, S. 508.