Ich Herman von Gru^enenstein¹ tun chunt vnd vergihe allen den, die disen brief an sehnt, hornt II oder lesnt, daz ich mit guter betrahtunge willecliche han gemachet vnd machen an disem briefe mit rehtem gellma^echede miner lieben swester Margareten allez, daz ich han ze Balga² vnd anderswa lute vnd gut, swaz mir || von minem bruder ze teile wart, also ob ich vervar vnd enbin ane rehte liberben, daz min swester Margareta sol han vnd erben daz selbe gut in allem dem rehte, als ich ez han. Vnd han ditz gemachede getan miner vorgnanten swester mit mines herren hant vnd gunst abbet Wilhelms von sant Gallen³ vnd mit mines herren hant vnd gunst hern .. Pitzenins von Sax⁴, von den ich daz selbe gut ze lehn han. Vnd ist min herre graf Hug von Muntfort vnd von Jagberch⁵ getri^vwer tragar an den lehen von sant Gallen miner vorgnanten swester. So ist Gozwin Anshalmes sa^eligen sun von Nancingen⁶ vnd Heinrich dez ammans sun von Veitkirch⁷ getri^vwe tragar miner swester an den lehen, die ich han von hern Pitzenin von Sax. Man sol o^vch wizzen, daz ich minem herren grauen Huge von Jagberch han versetzet allez min lute vnd min gut, daz ich han, vmb eine vnd funfzek march lotiges silbers Chostentzar⁸ gewages, die er mir dar vf gelihn hat, vnd sol daz selbe gut von im lo^esen von nu vasnaht vber driv iar, als an siner hantveste geschribn stat. Ob ich enbin vnd vervar ane rehte liberben, so sol min swester, diu hie vorgnennet ist, gebunden sin minem herren grauen Huge von Jagberch der losunge vnd dez cho^vffes, dez o^vch ich im gebunden bin, als an siner hantveste geschribn stat. Dez selben suln o^vch mine rehte liberben gebunden sin grauen Huge von Jagberch, ob ich si han. Vnd daz ditz allez sta^ete vnd gantz belibe, so gib ich Herman von Grunenstein miner swester Margareten disen brief, der gevestent ist mit mines herren insigel abbet Wilh. von sant Gallen vnd mit mines herren insigel hern Pitzenins von Sax vnd mit minem insigel zeim warn vrkunde aller der dinge, diu hie vor geschriben stant. Wir Wilhelm von gotes gnadn abbet ze sant Gallen vergehn an disem briefe, daz ditz gemachede geschehn ist mit vnser hant vnd gunst, vnd gebn dar vber vnser insigel an disen brief. Ich Pitzenin von Sax gib min insigel an disen brief ze ganzer warheit aller dinge, diu an disem briefe geschribn sint. Ditz geschach ze Veitkirch, do von gotes geburte warn driuzehnhundert iar vnd in dem ersten iare, an dem zinstage nach dem ingandem jare.

Source Fulltext: Chartularium Sangallense V, Nr. 2521, S. 22-23.