Wir Heinrich von gotz gnaden abt¹ vnd alles das capitel des gotzhuses ze sant Gallen kunden allen, die disen brief ansehent alder ho^errent lesen, || vnsern grůs vnd ein warheit diser nachgeschribenen dingen. Es gezimt vnseren êren wol, swa wir geischlich lute gefürderren mugen, das wir || es tv^on, vnd darvmbe so kunden wir allermenlichem, das für vns kan^a) vnser lieber dienstman her Rv^odolf von Landenberg² vnd || vns bat, das wir der vorgeschriben abt an vnserre vnd an vnsers gotzhuses vnd an vnsers capitels stat von ime vf nâemen du gu^eter, du er von vns vnd von vnserm gotzhuse ze lehen hatte, du hie nach geschriben stant, du da ligent bi Dyessenhouen³ ze Slattingen⁴ in dem dorfe vnd in des dorfes banne, das gut, das da buwent Heinrich vnd Cv^onrat die Kellerre vnd giltet nvn stuke vnd ein viertail kernen ellu jar, vnd o^vch vf nâemen die vorgenanten Heinrichen vnd Adelheit sin êlich wirtennen vnd Cv^onrathen sinen brůder vnd Katherinen vnd Adelheiden iro beider swester, vnd die manschaft, die die vorgenanten Kellerre von dem selben her Rv^odolf hatten, du giltet drizehenthalp stuk ellu jar, vnd den zehenden ze Wilistorf⁵, den Cv^onrat der Basendinger burger ze Dyessenhouen hatte o^vch von ime, den die vrowan von dem klo^vster bi Dyessenhouen, das man nemmet sant Katherinental⁶, hatten von dem selben Basendinger vmb aht stuke, vnd wir su geiben ellu vnd ieklichs ensunders dem selben klo^ester vnd dien vrowan vnd ir nachkomen, won er du selben gůter vnd lute dem klo^ester vnd dien vrowan hette dur sin noturfde^b) vnd dur sinen nuzze gegeben ze ko^vfenne vmb drisseg march vnd sehs march luters vnd lo^etigs silbers Dyessenhouer gewiht, dero er^c) ganzlich von inen gewert ist, als er vns veriah, vnd si bekeret het in sinen nuzz. Also veriehen wir der abt vnd das capitel, das wir ansahen vnsers gotzhuses nuzz und nâmen dise lute vnd disu gu^eter vf von her Rv^odolf mit allern dem rehte vnd der gewonheit, als es reht vnd gewonlich ist, sogtan lute vnd gu^eter vf ze nemenne, vnd geben su ellu vnd ieklichs ensunders dur bette hern Rv^odolfes dien vorgenanten vrowan iemerme ze niessenne vnd furbas ze verko^vfenne, swem si wellen, das man vnserm gotzhuse iemerme geben sol dannan von ellu jar ein halp pfunt wahses an sant Gallen tage ze einem vrkunde der alten herschaft. Vnd darvmbe das war vnd stâete belibe, swas hie geschriben stat, iemerme, so geben wir die vorgenanten der abt vnd das capitel an vnsers gotzhuses vnd an vnserre vnd an vnser nachkomen stat den selben klo^vstervrowan disen brief besigelten mit vnseren ingelen^d) dur bette hern Rv^odolfes von Landenberg vber disu sache ze einer staeter bezugenge. Ich der vorgenant her Rv^odolf vergih, das ein warheit ist, swas geschriben stat hie, vnd han es erworben an den selben minen herren vnd loben diser lute vnd gu^eter nach rehte were ze sinne der vrowen des vorgenanten klo^vsters ze Dyessenhouen vnd gib min ingesigel o^vch an disen brief mit minen herren och vber^e) disu sache. Dise brief wart gegeben ze sant Gallen, do man zalte von gotz geburt drucehenhundert jar, darnach in dem ersten jare, an sant Martins abende.

Source Fulltext: Chartularium Sangallense V, Nr. 2542, S. 38-39.