Wir ... der maister vnd die pfleger dez spitals ze Lindowe¹ vergehent offenlich an disem brief vnd tu^egent kunt allen den, die disen || selben brief ansehent ald ho^erent lesen, daz Wernhere der Hunde² burga^ere ze sant Gallen vnd Berchte sine husvrowe vmbe den || spitale ze Lindowe hent ko^vft mit iro silber rehte vnd redelich vnd durch ir baider sele willen ze ainem rehten lipdinge || iren baiden üben dise ho^eue, die hie nach gescriben stant, ze niessent aigenlich vnd gerůweklich in allem dem rehte vnde gedingde vntz an iro baider tode, alz hie nach gescriben stat, den houe ze Tanne³ in dem Albego^ewe⁴, der selbe houe gilt allu jare viere malter habern Wanger⁵ messe vnd ain pfunde pfenninge Costentzer mvnsse, den houe ze Wissensperch⁶, der Peters dez Frigen was, der selbe houe gilt allu jare zwai malter habern Lindower messe vnd sehs Schillinge pfenninge Costentzer mvnsse, den houe ze Stoggenwiler⁷, der Swarzachs waz, der selbe houe gilt allu jare zwai malter habern Lindower messe vnd zehen Schillinge pfenninge Costentzer mvnsse, dise trige vorgenanten houe sol slahen hagel vnd wint vnd gemainer schade, vnd den houe ze dem Mantzen⁸, der ist waltlehen, der Rietmans da was, der selbe houe gilt allu jare viere malter habern Wanger messe vnd ain pfunde pfenninge Costentzer mvnsse, vnd das selbe gelt dez selben houes sol niemer gewenkken. Die vorgenanten ho^eue alle viere sol der spitale ze Lindowe besetzen vnd inzetzen, daz vorgescriben gelte baidu koren vnd pfenninge der vorgesaiter ho^eue son wir allu jare Wernhere vnd siner hus vrowen den vorgenanten gene vnd antwrten in der stat ze Lindowe an allen ir schaden allu jare zewischen sant Andres dult vnd wiehenna^ehten, ald tu^egent wir daz niht vnd der spitale, in swas schaden siv da von immer gefallent, es sige von clage, von brieuen ald von botten furste den ersten botten, den selben schaden sol inen der spitale ga^entzelich abe tůne an allen iren schaden. Dar nach ist gedinget, swedres vnder inen zwain bi dem ersten stirbt, so sol der spitale ze Lindowe ze dez iarezit immerme allu jare von den drin ersten vorgenanten ho^euen zehen Schillinge pfenninge Costentzer mvnsse gene durch des selben sele willen an alle wider rede, alsus den armen an dem velt bi Lindowe ze Aeschach⁹ funf Schillinge pfenninge in iro kuchie vnd den armen alsam in dem spitale ze Lindowe funf Schillinge pfenninge in iro kuchie, vnd nach des andern tode so ist der selbe spitale gebunden ze geinde von den selben drin ho^euen zehen Schillinge pfenninge Costentzer mvnsse immerme allu jare ze des selben jarezit in allem dem rehte vnd gedingde, als da vor gesait ist. Vnd ist, das du armen an dem velt immer ga^endernt ald furko^vffent ir vorgenanten zehen Schillinge geltz, so sont die selben zehen Schillinge geltz an den spitale fallen ga^entzelich an alle wider rede. Ist och, daz div armen in dem spitale die drige vorgenanten ho^eue immer ga^endrent oder verko^vffent, so sont die selben vorgesprochen ho^eue an die armen an dem velt fallen ga^entzelich an alle wider rede. Vber daz ist och gedinget, swedres vnder Wernhere vnd siner husvrown den vorgenanten bi dem ersten stirbt, so ist der spitale ze Lindowe gebunden ze obfferende ze dez selben jarzit immerme allu jare svben fenninge Costentzer mvnsse oder messe mit frument vntz der svbendun vnsern herren den Brůderen ze Lindowe¹⁰, vnd nach dez andern tode alsam suben Pfenninge Costentzer in dem selben rehte, die selben viertzehen pfenninge sol man immerme obfferen oder messe mit frumen, so ez ze schulden kunt, den vorgenanten Brůderen, alls die wile vntz man ze dem selben spitale singen oder gotzdienste niht irworben het, swenne aber dem spitale singen oder gotzdienst irworben ist, so sol man mit den selben viertzehen pfenninge misse frumen ze dem spitale vnd niht ze den Brůdern, vnd die selben pfenninge sol man gene immerme abe dem houe ze dem Mantzen. Dar zů ist och gedinget, das nach ir baider tode der dikkegenente spitale ist gebunde ze geinde immerme allu jare, swenne iro jarzit ist, den vorgenanten Brůderen viere Schillinge pfenninge Costentzer mvnsse abe dem selben houe ze dem Mantzen an alle Widerrede vnd och mit disem gedingde, ist das die selben Brůder die selben viere Schillinge geltz immer verko^vffent, so sont sie ledige sin vnd fallen an den selben spitale, ist och das der spitale immer verko^vffet den selben hove, so sol er aigenlich fallen an alle wider rede an die vorgenanten Brůder. Alsam ist och gedinget, swedres vnder Wernhere dem vorgenanten vnd siner husvrown bi dem ersten stirbt, so sol daz ander daz vorgenant gelte ga^entzelich niessen vntz an sinen tot in allem dem rehte vnd gedingde, als da vor gescriben stât, vnd nach ir baider tode so ist dem spitale ledige daz gelte der vorgenanten ho^eve, alz da vor gesait ist. Dise dinges sint gezuge her Heinrich Graue der lutpriester, V^olrich Prender^a) der amman von Lindowe^b), brůder V^olrich von Ro^etenberg¹¹, Růdolf Necher, Andres Gebtz, Arnolt Milwe vnd Hainze der amman in dem spitale. Vnd ze ainem offen vrkunde vnd rehter sta^etie alle der dinge vnd gedingde, so an disem brief gescriben stât, so geben wir Wernhere dem dikkegenenten vnd Berchtun siner husvrown disen brief besigelten mit dez vorgenanten spitals hus insigel. Dierre brief wart gescriben, do man von gottes geburt zalt drivzehen hvndert jare vnd in dem ersten jare, an sant Katherinvn tage.

Source Fulltext: Chartularium Sangallense V, Nr. 2544, S. 41-42.