Wir von gottis ginadin abt Henrich von sante Gallin¹ kundin allin den, die dizin brieue lesint oder ho^errint lesin, daz für || vns kom Henrich der Lo^ewe, hern Henrichs seligin dez Lo^ewin sun von Zukinriet², mit siner elicher wirtennun vron Anastasiun, || vnd^a) won der selb Henrich der iezginampter siner wirtennun vmbe ir henstur ze Widerlegung den cehindin ze Albrehtswile³ vnd ze Dietinllwile⁴ mit andrin sinen guetern virsezzit hat, darumbe so nam du selb vrowe mit ir wirtes willin nah reht vor vns ir vatter den von Buel⁵ ze einem vogt, mit des vogtis willin do virkoft du selb vro Anastasia vnd ir wirt Henrich der Lowe die seibin cehindin, die von vns vnd vnserm gotzhuse lehin sint, mit vnserr hant vnd allim dem, so darzů ho^errit, swie ez namin het, vnd och mit vf genne in vnserr hant vnd mit wort vnd mit werch, mit giberde vnd aller der giciert, so man bidarf ze so gitanin dingin, do virkoftint su reht vnd redilich die vorginamptin cehindin ze Albrehtswile vnd ze Dietinwile V^olrichim dem Smit von Husin⁶ vmbe sehs vnd zewencig march, der der selb V^olrich si volliklich giwert, als da virgehin von in wart. Daz aber du vorginampt vro Anastasia mit dizim virkofinne an der Widerlegung ir henstur nut bitrogin wurt, do sast der selb Lowe ir wirt ir an dizir cehindin stat den houe ze Schowingin⁷, damit ir ding gibesret wart vnd nut gibo^eseret. Och so gilopt du selb vrowe mit ir truwe in e^adis wis, daz si wider dem, so dauor giscribin stat, iemer ko^eme oder tet mit wort alt mit werch, vnd enceh sich offinlich vnd willeklich der seibin cehindin vnd alles des rehtis vnd der helf, so si gihan mo^ehte iemer hie wider ze ko^enne^b) vor gestilichim oder vor weltilichim giriht. Daz aber diz war si vnd stet bilib, do bisigiltin wir dizin brieue mit vnsern ingisigil. Ich Henrich der Lo^ewe virgih alles des, so dauor gischribin stat, ze einer warhet vnd bint mich vnd min erbin, daz wir der seibin cehindin V^olrichs wem sien vor gestilichm vnd weltelichim giriht. Vnd ze einer warhet do hangt ich min ingisigil ze mines herrin ingisigil an dizin brieue. Wir der vorginampt abt H. virgehin och, daz wir V^oI. von Husin dizu gueter virlih^b) mit vnser hant, do si vns H. vnd sin wirtenn vf gabin. Diz bischah ze Wil⁸, vnd wart dirre brieue gigebin, do man zalt von gottis giburt drucehinhundert vnd zwe jar, IIII. idus decembr. indic. der I^a. Do ze gegin [w]az^c) her Dieth. von Krenkingin⁹, her H. von Griessinberg¹⁰, hern Jo. von Scho^eninberg¹¹, her V^oI. vnd her Walt, von Lôwinberg¹², H. der lang Lowe¹³, [..]^c) der Om¹⁴, C. Gruninsten, C. der Kamerer, Hans von Albretswile, Hans der Goltzsmit¹⁵ vnd ander biderber lut ginuog.

Source Fulltext: Chartularium Sangallense V, Nr. 2574, S. 64-65.