Magistri Symon plebanus ecclesie sancti Stephani Constanciensis¹ et H. Pfefferh(art) canonicus Werdensis² iudices seu auditores ad causarum universitatem ab honorabilibus viris gerentibus vices reverendi in Christo patris ac domini H. dei gracia episcopi Constanciensis³ specialiter deputati dilectis in Christo plebanis seu viceplebanis in Marpach⁴ et in Altstetten⁵ ceterisque, ad quos presentes pervenerint, salutem in domino. Conquesti sunt nobis dilecti in Christo rector sancti Laurencii⁶ et C. Camerarius prebendarius sancti Magni⁷ ecclesiarum apud sanctum Gallum, quod dictus Gru^ennenstain⁸ ipsos in opido Wil⁹ duobus equis ipsorum sub noctis silencio contra deum et iusticiam temere spoliarit. Quocirca devotioni vestre sub pena suspensionis ab officio precipiendo mandamus, quatenus, si est ita, eundem diligenter moneatis et inducatis, alius vestrum, qui requisitus fuerit, alium non expectans, ut predictis rectori et prebendario ablatos equos cum effectu restituat et de iniuria satisfaciat infra proximos octo dies, alioquin extunc ipsum, quem presentibus excommunicamus, excommunicatum et ecclesias, quarum est subditus vel ad quarum parochias devenerit seu dictos equos deduxerit, quas interdicimus, interdictioni publice pronuncietis, cessantes et cessari facientes in eisdem penitus a divinis iuxta formam statutorum concilii Maguntinensis¹⁰. Sigillo utimur episcopali. Dat. Constancie anno domini MCCC tercio, V kl. iulii, ind. prima. R. hc^a).

Source Fulltext: Chartularium Sangallense V, Nr. 2589, S. 72.