Wir Hainrieh von gottes gnaden abt des gotzhuses ze sant Gallen¹ kunden allen, die disen brief ansehent oder ho^erent lesen, ain erkantnust der nachgescribenen dinge. Wissen alle, den es ze wis||senne beschiht, de mit vnserre gunst, willen vnd^a) ortfrumi die erberen lute Hainrich der Keller von Elgowa² vnd Johans sin sun mit gunst, willen vnd ortfrumi Adelhaiden des vorgenanden || Johanses elichen wirtennen vnd Walthers ir sunes, die vnsers gotzhuses aigen sint, ainen aker haisset Hasenacher³, des sint zwo juchert, vnd ain hofstat, du bedu ligent ze Sneita⁴, die su || von vnserm gotzhuse ze cinsaigen hatten vmbe vier pfenninge Costenzer muntze jergelich ze gebenne an sant Gallen tage vf sant Gallen alter^b), dien lieben in gotte der priorinen vnd den vrowen des conuentes ze Wintertur⁵ ze koffenne haint gegeben recht vnd redelich vnd ane alle geuerde vmbe funf pfunt pfenninge Zuricher muntze, die su von inen enpfangen habent vnd die su bekeret hant in ir elichen nuz, des su vergehent an disem briefe, vnd suln den selben aker vnd die hofestat von dem vorgenanden vnserm gotzhuse ze cinsaigen haben vmbe den vorgenanden eins. Vnd wan der vorgenande aker morgengabe wc der vorgenanden vrowen Adelhaiden des vorgenanden Johansen elichen wirtennen, so hat si sich sin enzigen ze Elgowa vffe ainer offener lantstraze vrilich vnd vnbetwungenlich reht vnd redelich vnd ane alle geuerde vnd enzihet sich sin an disem briefe mit des erberen mannes hant Johanses des Kellers von Elgowa ir wirtes vetern, der ir mit ir wirtes willen vor gerihte mit rechter vrtailde ze vogte geben wart. Vnd hat gelobt du vorgenande Adelhait mit dem vorgenanden ir vogte, ob si den vorgenanden aker iemer angespreche an gaistlichem oder an weltlichem gerihte oder die vorgenanden vrowan oder ir nachomen an dem selben acher iemer bekrenke oder beswerre de kainen weg, de si inen gebunden sie ze gebenne zehen pfunt pfenninge Zuricher munze. O^vch hat sich der vorganande^c) Walther der vorgenanden Adelhaiden sun enzigen alles des rechtes, so er hatte^d) oder haben solte von siner můter an dem vorgenanden aker. O^vch hant sich gebunden die vorgenanden Hainrich vnd Johans vnd du vorgenande Adelhait vnd Walther ir sun, des vorgenanden akers vnd der vorgenanden hofestat vur ain cinsaigen were ze sinne an gaistlichem vnd an weltlichem gerihte vnd an allen steten, da es die vorgenanden vrowan oder ir nachomen bedürfen, vnd habent sich dar vmbe enzigen gemainlich mit enandren aller helfe gaistlichs vnd weltlichs gerihtes, mit der su sich geschirmen mo^echten, de su der vorgenanden ^e) aker vnd hofestat niht were werin in allem rechte, als da vor gescriben ist, oder da mitte su die vorgenanden vrowan oder ir nachomen bekrenken oder beswerren mo^echten an dem vorgenanden aker vnd an der vorgenanden hofestat de kainen weg. Vnd ze ainer offener bezugunge aller der vorgescribenen dinge dar vmbe so haben wir durch bette der vorgenanden vnserre gotzhus luten den vorgenanden vrowan disen brief besigelten geben mit vnserm insigele. Wir Hainrich der Keller, Johans sin sun, Adelhaid des vorgenanden Johanses eliche wirtenne vnd Walther iro sun veriehen offenlich an disem briefe, de du vorgescribenen ding ellusament von vns beschehen sint in allem rechte, als da vorgescriben ist. Vnd dar vmbe so haben wir gebetten den vorgenanden vnsern herren den abt disen brief besigellen vber vns ze ainem geweren vrkunde aller der vorgescribenen dinge. Ich der vorgenande Johans des vorgenanden Hainrichs brůder vergihe offenlich an disem briefe, de ich der vorgenanden Adelhaiden ze vogte geben wart mit rechter vrtailde vnd de si du vorgescribenen ding mit miner hant getan hat in allern recht, als da vor gescriben ist, vnd han dar vmbe gebetten mit der vorgenanden Adelhaiden den vorgenanden minen herren disen brief besigellen mit sinem insigel ze ainem geweren Urkunde aller der vorgescribenen dinge. Dis sint gezuge, die ze gegini waren, da du vorgescribenen ding geschahen, .. her Wernher der lupriester von Elgowa, der von Bernegge⁶ kilcherre der kilchen ze Adorf⁷, Růdolf der Forster, Cůnrat Ribi burger ze Wintertur vnd Hainrich der Wirt von Elgowa, die dar gebetten wurden. Dis geschach ze Elgowa, do von gottes geburte waren dnizehenhundert jar, darnach in dem vierden jare, an dem nechsten vritage vor vnserre vrowen tult ze der liehtmis, in dem andern jare Romer stur jare.

Source Fulltext: Chartularium Sangallense V, Nr. 2609, S. 89-90.