Allen dien, die disen gegenwurtigen brief sechent lesent oder ho^erent lesen, kund ich her V^olrich von Sax¹ ritter, das ich bedach||teklich vnd willeklich vnd mit miner frunde rate han verko^vffet dem edelen herren grauen Friderich von Toggenburg² min hus, de man da || heisset du Wildeburg³, vnd den stein, da du burg vf stat, vnd steg vnd weg, der da zů ho^eret, vnd den se vnd die mulin bi der burg⁴ vnd alles, dc || ich han ensit dem tobel⁵, de bi dem selben hus ist, hin wider sant Johanne⁶, mit luten vnd gůte, an dc gůt, de da heisset vf dem Mose⁷, vmb vier hundert mark lo^etiges silbers Kostenzer gewicht vnd da genges vnd gebes. Vnd hat er mich des silbers gar||
gewert, vnd hab ich de verkeret in minen nuz, vnd hab ime dem^a) iezegenanten herren graue Friderich dis vorgenande hus vnd dar zů steg vnd weg vnd du gu^eter, du hie genemmet sint, gegeben vnd verko^vffet recht vnd redlich in eins rechten vnd redlichen ko^vffes wis an alle geuerde in allem dem rechte, so dar zů ho^eret, es si an holze ald an velde, an wunne ald an weide, mit wasen, mit zwie, mit blůmen, mit wasser, mit luten vnd mit gůte vnd mit allem dem rechte vnd rechtunge, gesůchter vnd vngesůchter, genemter vnd vngenemter, so dar zů ho^erent ald ich ald kein min forder es her bracht hanben^b>. Vnd sezen vnd lassen den egenanten edlen herren graven Friderichen von Toggenburg in rechte vnd in follig vnd nuzlich gewer dis vorgenanden huses vnd der egenanter gu^eter, ime ze niessenne vnd ze behabenne vnd ze besezen vnd zentsezenne vnd die lute niessenne, swie er wil, als ein man sin eigen gůt niessen vnd bestellen sol. Vnd wer o^vch de, das der edel herre graue Friderich ald kein sin erbe keinen gebresten ald kein summde hant an allem disem vorgenanden gůte ald sunderlich an ir dekeinem, das sol ich ald min erben ime vnd sinen erben vs richten vnd ledigon nach rechte, also de su von vnseren wegen^c) keinen gebresten haben. Vnd de||
dis alles stete belibe vnd an allen krieg nu vnd her nach bi vns vnd vnseren nakomen, so gebent wir der vorgenande her V^olrich von Sax disen gegen wurtigen brief besigelt offenlich mit minem ingesigel ze einem geweren vnd gewissen vrkunde vnd ze einer dester merer Sicherheit dir vorgeschribener dinge. Dis beschach vnd wart dir brief gegeben ze Walastade⁸ in der stat, da ze gegen waren dise gezuge, graue Růdolf von Werdenberg⁹, her V^olr. von Empz¹⁰ ritter, V^olr. von Montfort¹¹, Luze von Sigberg¹², Heinrich von Arben¹³, Wilheln von Nenzingen¹⁴, Jo. von Twingenstein¹⁵, Růdolf von Wittenwile¹⁶, V^olr. Sno^ede¹⁷ vnd ander erber lute genůge, do man zalte von gottes geburte druzechen hundert jar^d) vnd dar zů in dem drizechenden jare, an dem samstage, dar an sant Glerins tag was.

Source Fulltext: Chartularium Sangallense V, Nr. 2839, S. 229-230.