Henricus dei gratia Romanorum imperator semper augustus prudentibus viris in Constantia, in Thurego, in Scafusa¹ et in sancto Gallo ac in ceteris civitatibus, locis || et oppidis in advocatia nobilis viri Eberhardi de Burgelon² constitutis scultetis, ministris, magistris civium, consulibus, civibus et hominibus universis fidelibus suis di||lectis necnon kawercinis et Judeis in dicta advocatia, civitatibus et oppidis commorantibus gratiam suam et omne bonum. De fide experta et circumspectionis industria || honorabilis viri magistri Hermani de Stoka³ canonici Constanciensis notarii nostri karissimi plenam obtinentes fiduciam, ipsum ad vos duximus transmittendum, dantes sibi per se vel per alium et dicto advocato nostro plenam et liberam potestatem recipiendi racionem^a) de sturis et redditibus nostris preteritis, postquam partes Italie intravimus, ac petendi, requirendi et imponendi vobis et cuilibet vestrum sturas tam super festum beati Martini preteritum^b) proxime quam super festum beati Martini venturum proxime nobis dandas et huiusmodi sturas exigendi, colligendi, recipiendi ac personis aliis assignandi et in utilitatem nostram et imperii, prout ipsos informavimus et sibi imposuimus, convertendi ac vos quitandi et liberos et solutos a sturis sibi vel ei, cui ipsas deputaverint, per vos datis et assignatis dicendi et pronuntiandi, de quibus et nos vos et civitatem quamlibet presentibus quitamus et dicimus liberos et solutos, ratum et gratum habituri, quicquid iidem in hac parte vobiscum tractaverint, concordaverint et duxerint faciendum, promittentes vobis et cuilibet vestrum, quod super solutione et libertatione sturarum, ad quemcumque terminum vos litteras eorundem habere contigerit una cum tenore presentium, hoc ratum habebimus atque firmum nec ultra hoc sturas aliquas interim exigemus. Quapropter fidelitati vestre sub obtentu nostri favoris et gratie ac sub pena revocationis omnium iurium, privilegiorum et gratiarum vobis ab imperio concessarum preeipimus et mandamus, quatinus ipsis in premissis et quolibet premissorum obediatis et efficaciter intendatis. Specialiter autem vobis universis civitatibus in dicta advocatia constitutis sub pena predicta imponimus, ut kawercinos et Judeos vobiscum morantes ad predicta per arestationem personarum et rerum arceatis et imperiali auctoritate efficaciter compellatis. Super predictis enim vel aliquo predictorum nuntios vel litteras vestras seu excusationes aliquas audire, videre vel admittere nullatenus volumus, quia cum predictis sturis servitores et gentem armatam nobis transmittere facimus et mandamus, qui super festum beate Walpurgis, in quo generalem exercitum indiximus, nobiscum debent esse certitudinaliter constituti, qui si non venirent, de hoc omnem culpam vobis imponere nos oportet, qualiter hoc vobis conveniat, provide cogitetis. Pensare etiam et considerare vos volumus, quod predictas sturas ad aliud convertere non disponimus preterquam ad necessitates imperii et ad reformationem boni Status eiusdem et rei publice, in quo vester honor, profectus et utilitas multipliciter procurantur, quem quidem statum quamvis in primo nostro ingressu in Italiam heu miserabiliter disturbatum invenimus, tamen nobis divina favente dementia pro maiori parte reformavimus, quo plenius reformato libenter vobis in sturis et aliis plus solito parcere disponimus et vos in omnibus favorabiliter pertractare. Unde omnino credimus, quod devotio vestra sit prompta et obediens ad predicta, super qua promptitudine vel tarditate, si eam quod non credimus facere contingeret, prefato magistro Hermano in suo reditu vel antea suis litteris adhibebimus plenam fidem. Presentium testimonio litterarum. Dat. apud Montem Imperialem⁴ in castris supra Florentiam⁵, XI. kln. februar. anno domini M°CCC°XIII°, regni nostri anno quinto, imperii vero primo.

Source Fulltext: Chartularium Sangallense V, Nr. 2840, S. 230-231.