In^a) dem namen vnsers herren. Allen dien, die disen brief lesent oder ho^erent lesen, kvnden wir swester Margareta ebtischen vnt alle der conuent von Maggeno^vwe¹, das der wolbescheiden man her Wernher der Hunt² bur||ger ze sant Gallen von siner bescheidenheit vnt von der minne, die er ze gotte hat, vnserm kloster gevo^eget vnt geko^efet hat an allen vnsern schaden mit sinem gv^ote den hof ze Brv^ewile³, der giltet ellv jar zehen malter || kornes, des sint fvnphv vesan vnt fvnphv habern Zeller⁴ messes, vnt drizeg schillinge phenninge Costenzer mvnze, vnt den hof ze Helfenberg⁵ halben, der giltet ierglich siben malter kornes, des ist ein halbe teil vesan, der || ander halb teil habre sant Galler messes, vnt zehen Schillinge phenninge Costenzer munzze, vnt das gerute, das giltet ellv jar aht mvtte kernen Wiler⁶ messes vnt zwie malter habern des selben messes, vnt das gvt ze Flawile⁷, das da heizet in der Guphe⁸, das er vns geko^vphet hat vmb den von Baldegga⁹, das giltet ierglich aht malter kornes, des sint vierv vesan vnt vierv habern sant Galler messes. Disv vorgenanden gv^eter dv sol der vorgenande her Wernher vnt sin wirtinne vro Berchtain ganzem ^b) nuzze han alle die wile, so sv lebent, vnt nach ir beider tode so sint su lidig vnserm akloster^c), also das sv niemer verko^vphet noch versezzet werden svn weder ze libgedinge noch ze enheinrehande sache, mit der sv vnserm gotzhuse enphlo^vhet oder entphro^emdet mvgint werden. Vnt swenne aber das besehene, das wir dis gedinge brechin noch es nvt stete woltin han, als es hie vor geschriben ist, so sol man dv vorgenanden gu^eter verko^vphen an alle wider rêde, vnt des Silbers, das man dar abe lo^eset, des sol man ein teil geben vnsren herron von Wettingen¹⁰, den andern den vro^vwan von Tenninkon¹¹, den dritten dem spital ze sant Gallen¹², vnt erbêtin aber wir vnser herren von Wêttingen, das su ir teil abliessin, so sol er werden den vro^vwan von Tenninkon, vnt were o^vch das, das die selben vro^vwan ir teil abe woltin lan durch vnsern willen, so sol es ganzlichen gevallen sin dem spital ze sant Gallen. Disv vorgenanden gv^eter dv hat der vorgenande her Wernher alsus geordnat vnt gesezzet durch siner sele heiles willen vnt och durch der vorgenandvn Berchtvn sinr wirtinnvn sele willen also, das man nach ir beider tode geben sol vnsren herron von Wettingen ellu iar an vier nvn Schillinge Costenzer, das ist zwie iar messe gevrumet, vnt ze Salmanswile¹³ vier vnt vier Schillinge, das ist ein iar messv gevrumet¹⁴, disv berichtvnge dirrv iargeziten sol beschehen ab dem hof^d) ze Brv^owile. Dar nach sol man geben vnseren vro^vwan vnt aller der samnvnge gemeinlichen fvnph Schillingen minre den dru phvnt phenninge Costenzer munze in der vastvn vmb des wisten brotes, so man haben mag. Da von hein wir dem vorgenanden her Wernher vnt sinr wirttinnvn gelopt, nach ir beider tode ze betten vnser ein iechlichv drizug pater noster vnt als manig aue Maria in der wuchvn, o^vch in dem gezite der vastvn. Dar nach sol man geben ein phvnt phenninge vmb eier entzwuschint ostran vnt phingsten, dar vmbe svlen wir bettan in dem selben gezite en iechlichv vro^vwa zwenzig pater noster vnt als manig aue Maria. In dem aduent sol man geben ein phvnt phenninge vmb o^ele, da von sol o^vch sprechen en iechlich vro^vwa in dem selben gezite zwenzug pater noster vnt als manig aue Maria in der wuchvn. Dar nach ze den vier hohgeziten vnser vro^vwn vnt ze den vier vronvastan, die in dem iare koment, ze eim iechlichen diser geziten sint gesezzet vierzehen Schillinge phenninge, der sol man geben zehen Schilling vmb win vnt vier Schilling vmb vische. Dar vmbe sol man sprechen ein placebo ze disen vorgenanden aht hochziten. Vnt swenne man disv vorgeschribnen gesezde nvt beheilte, also das man der samnvnge vnderzuhen oder abbrechen wo^elte disv gedinge, als sv gesezzet vnt da vor genemmet sint, so sol man mit rehtem gedinge vnsren herron von Wettingen geben ein teil von dem vorgenanden selgerete, den andern den vro^vwan von Tenninkon, den dritten dem spittal ze sant Gallen, mit allen den gedingen, als es o^vch da vor an disem brief gescriben stat. Swenne der vorgenande her Wernher vnt sin wirtinnv dv vorgenande vro Bertha ersterbent, so sol man disen brief entwurten dem vorgenanden spital ze sant Gallen, der sol in iemermer behalten¹⁵. Das^e) dis en warheit si vnt o^vch stete belibe, das an disem brieue stat, dar vmbe so henken wir vnsers herren des aptes ingesigel von Wettingen vnt vnsers klosters ingesigel an disen brief ze einem gewêren vrkvnde aller der dingen, so hie vor geschriben sint. Dirre brief wart gegeben, do man zalte von gottes geburte drvzehen hvndert iar, dar nach in dem achzehenden jare.

Source Fulltext: Chartularium Sangallense V, Nr. 3038, S. 345-347.