Omnibus presencium inspectoribus Hainr. dei gracia abbas¹ totusque conventus monasterii sancti Galli ordinis sancti Benedicti Const(a)n(ciensis) dyocisis orationes in domino || cum noticia subscriptorum. Ut ea, que fiunt cum tempore, simul cum ipso non transeant, expedit ea scripturarum et testium subsidiis adiuvari. Ad singulorum igitur et omnium noticiam per||ducimus et scripto presenti publice profitemur, quod Ita relicta quondam pie memorie Amoris de Horwen, Amor, Cůnradus et Iohannes² filii ipsius ministeriales monasterii nostri || supradicti non vi nec dolo seducti, sed sponte coram nobis profitebantur, wolentes^a) eandem confessionem eandem vim eumque^b) vigorem habere, ac si in iure facta esset coram iudice suo competenti, quod Itam filiam quondam Hainrici Cellerarii de Rosruti³ uxorem legittimam Cůnradi Mollitoris de Braitenloh⁴ et liberos suos procreatos nunc et inposterum procreandos, quos a nobis seu monasterio nostro predicto titulo feodali in feodum habuerunt, honorabilibus in Christo ..^c) abbati et .. conventui monasterii in Piscina⁵ ordinis et dyocisis predictorum et ipsi monasterio, ac omne ius, quod ipsis competiit seu competere poterat in eisdem ex causis quibuscumque, vendiderunt ac iusto vendicionis titulo in ipsos et eorum monasterium transtulerunt pro quadraginta libris denariorum Const(a)n(ciensium), quas ab ipsis in pecunia numerata receperunt et in usus suos expenderunt necessarios et evidentes, prout modo quo supra publice fatebantur, renunciantes ad manus nostras pro se et ipsorum successoribus infeodacioni predicte et omni iuri, quod ipsis competiit in hominibus predictis seu competere poterat ex causis quibuscumque. Nos itaque recepta resignacione predicta quamvis de ipsis hominibus, in quibus directum nobis competebat dominium, pro voluntate nostra potuissemus disposuisse, micius tamen cum dictis emptoribus et eorum monasterio pietatis causa agere cupientes, diligenti tractatu premisso et sollerti adhibita deliberacione communi et unanimi consilio et consensus^a) omnium nostrum habito ac invento, predictam Itam cum liberis suis predictis supradicto .. abbati et .. conventui monasterii de Piscina ex certa sciencia donavimus ac in iusto donacionis titulo in ipsos et ipsorum transtulimus et transferimus monasterium litteras per presentes, qua donacione facta predicti .. abbas et conventus in recompensam dicte donacionis ac iuris directi dominii nobis ut premissum est competenti^a) duas marcas argenti ponderis usualis nobis et ad fabricam nostri monasterii obtulerunt et tradiderunt, quas ab ipsis recepisse recongnoscimus hiis in scriptis. Et ut omnia et singula||
premissa perpetua stabilitate gaudeant et fruantur, renunciamus pro nobis nostrisque successoribus, qui pro tempore fuerint, beneficio restitucionis in integrum principaliter et incidenter, deffensioni non adhibite sollempnitatis, excepcionibus doli mali, non numerate pecunie, decepcionis ultra dimidiam iusti precii, litteris a sede apostolica seu aliunde inpetratis vel eciam inpetrandis et specialiter eis, per quas res ecclesiastice, que male dicuntur alienate, repeti consweverunt, adhibitis in premissis et ipsorum quolibet verborum et gestuum sollempnitatibus debitis et conswetis. In quorum evidenciam et perpetuam firmitatem presens instrumentum sigillis nostris voluimus roborari. Datum et actum in Wila⁶, anno domini M°.CCC°.XVIII°, indictione I^a, presentibus testibus ad hoc vocatis specialiter et rogatis videlicet domino Johanne plebano in Wila, domino Bertoldo dicti^a) Vischer, Hainricus^d) Omo de Raitenberg⁷, .. rector ecclesie in Wartense et Hadmannus⁸ frater suus, Burkardus de Ainwile⁹, Cůnradus de Gloten¹⁰, Bertoldus Ru^edlingarius de Wil, Albertus Cellerarius de Buziswile¹¹, Růdolfus et Cůnradus et Hainricus dicti Risen fratres, Hainricus Snewili, Friscinus de Hemberg¹², Růd. Krilberger de Bramshouen¹³ et quampluribus aliis fidedignis.

Source Fulltext: Chartularium Sangallense V, Nr. 3020, S. 332-333.