In gottis namin amen. Allen den, dien dirre brief wirt zir kenninne, || kvnd ich her Cv^onrat von Bvssenanc¹ ritter vnd^b) vrige, dc ich den erberen || gaischlichin vrowen der abtiscinne vnd dem convente gimainliche dez || chlosterz zi Magginowe² ordens von Zitelz habe zi koffinne gigebin reht vnd redlich minen achchir, der da lid in dem banne zi Winveidin³ vnd stozit vndnan an den wingartin, der da haissit in der Swerzvn⁴ vnd ist der vorginantin abbatissinen vnd dez conventiz zi Magginowe, vnd horte der selbe ackir in den hof, den der Gvntringer bvwit von mir hern Cv^onrat von Bvssenanc, vnd gib ich inen och, swaz von mir lehin waz, de obnan in dem seibin wingartin lit vnd vnder vangin ist mit marestain, vnd hab ich inen de vor ginante gvot den ackir vnd de lehin obnan in dem wingargartin^c) vmb zwelf phvnt phenninge Costinzer gigebin, vnd hant der mich lieblich giwert, vnd vergihe och de, de ich inen de gilobt han miner vrowvn der abbittissinne vnd dem convent zi Magginowe, de ich dez kofiz^d) fur mich vnd vur alle min erbin nach rehte sol wer sin mit allem dem rehte, de zvo den vor ginanten gvetern horit, vnd de disv sachchi vnd dirre kovf war vnd ste^ati si vnd bilibe, dar vbir gib ich der vor ginante her Cv^onrat von Bvssenanc disin brief miner vrowun der vor ginanten vnd dem convente zi Magginowe zi ainer^e) sicherhait vnd zainem warin vrkvnde vnd tvon hieran min reht insygil. Vnd wart dirre brief gigebin vnd biscah och dirre kôf zi Winveldin in dem dorf in dem jare, do man zalte von gottiz gibvrt drvzehinhvndirt jar, dar nach in dem nvnzehindin jare, an sant Gergin tag, vnd warint zi gegni her Fridrich⁵ der kilcherre zi Winveldin, Eberhart Swa^ertli, Hvg Scnewis, Jacob Ramvng bvrgerre zi Costinzze⁶ vnd ander erber lvt ginvoge.

Source Fulltext: Chartularium Sangallense V, Nr. 3045, S. 350-351.