Allen den, die disen brief ansehent lesent oder ho^erent lesen, kvnden wir swester || Adlhait ebtisschenn vnd alle der conuent des gotzhuses ze Tennichon¹ des ordens || von Citêl in Costenzer bistôn ein erkantnvste der nach geschribenne dinge. Wissen alle || die, den es ze wissen beschiet, daz wir vser lieben thoter swester Adelhait von Wile² ze ko^vffenn haben gegeben zwen mut kernen geltz, ain vsser dem kasten, den andern ze Stetfurt³ von dem gv^ot, de da haiset des Schaffers gv^ot, vnd die selben zwen mut kernen die sol si niessen ze ende ir wile vn^a) sol man ir den kernen gen ze sant Martis dult, darumbe so han wir enphangen phvnfthalb phunt phenning Costenzer mvns, die wir verzert vnd bekert habent in vnser elichen nutze, vnd veriehen och, dc si vmb den ander mut kernen vns dester mere phenning hat gegeben, darumbe daz er eweklich nach ir tode vnserm gotzhuse vnd dem convent belibe, also dc man der custrinen sol geben ain mut kernen geltz, da sol si von geben ain vertal kernen an die kerzen, die man brent, so man vnser herren vf hebt, das ander vertal kernen sol si geben ze den oflaten, die man ze vnserm herren bedarf, du ander zwai^b) viertal kernen dv sol si geben an daz lieht vf de dormenter^c) in die kamer, vnd sol man darumbe der vorgenanten swester Adlhaiden von Wile vnd ir vatters vnd ir swester gedenken vnd nach ir tode ir iargezit began, vnd so ir jargecit ist, so sol man dem priester, der denne messe singet oder spricht, ain messe frumen, vnd wer aber dc, daz wir dc iargecit vber sehen weiten, dc wir es nvt weiten began, als da vor geschriben stat, so sol de vorgenemt gelt ledig sin vnsren herren von Capelle⁴ vber tische. Vn^a) das dis alles war vnd stete belib, darumbe so geben wir^d) ir disen brief besigelten mit vnserm insigel ze ainem waren vrkvnde aller der dinge, so da vor geschoben stat. Dir brief wart gegeben, do man zalt von gottes geburt drvzehen hvndert iar vnd dar nach in dem nvnzehden jar, an sant Georien tag.

Source Fulltext: Chartularium Sangallense V, Nr. 3046, S. 351-352.