Johannes de Porta decanus ecclesie Const(antiensis)¹ et magister Waltherus scolasticus² canonici eiusdem ecclesie Const(antiensis) vicarii generales in spirituali||bus et temporalibus a sanctissimo patre ac domino Johanne sancte Romane sedis summo pontifice³ ecclesie Const(antiensis) nunc vacantis⁴ deputati omnibus Christi fidelibus || salutem et sinceram in domino caritatem. Ut ad pias causas erogata perpetuam habeant firmitatem, expedit, ut literis autenticis perhennentur. Quare notum I sit omnibus presentibus et futuris, quod constitutus in nostri presentia vir strennuus Johannes de Rinegge⁵ ministerialis ecclesie Const(antiensis) predicte publice et sollempniter recognovit, quod ipse ob instantiam devotam precum quondam Růdolfi dicti Rinegger⁶ patrui sui possessiones immobiles, videlicet curiam sitam in Anwille⁷ dictam Disunt Baches, quam nunc colit Cůnr. dictus Herre et quam prefatus quondam patruus suus in bona valitudine constitutus in eum donatione plena et perfecta corporaliter transtulit, cum omnibus suis iuribus et pertinentiis corporalibus et incorporalibus, notis et ignotis in monasterium de Crutzlino⁸ situm extra muros civitatis Const(antie) transtulerit per donationem liberam et perfectam, apprehensione corporali subsecuta, que quidem possessiones ipsi Johanni, ut asseruit, pleno iure dominii vel quasi pertinebant, in quarum etiam possessione fuerat pacifica et quieta, petens a nobis, ut donationem ipsam gratam et ratam habere dignaremur de possessionibus predictis et ipsarum pertinentiis singulis et universis tanquam vicarii ecclesie memorate. Donationem etiam ipsam de predictis omnibus et singulis coram nobis sollempniter iteravit, causas pias et legittimas facte donationis exprimendo, has videlicet devotas preces quondam Růdolfi dicti Rinegger patrui sui predicti, qui in ipsum easdem transferebat, qui etiam sepulturam suam in dicto monasterio elegit aput maiores suos, qui eandem ibidem elegerant et ibidem requiescunt. Condictum est etiam et conventum, quod ipsum monasterium de Crutzlino in perpetuum die anniversario dicti quondam Růdolfi in commemorationem salutis anime sue conventualibus ipsius monasterii unam refectionem consuetam annis singulis debeat ministrare et alteram refectionem iterum annis singulis tertio die conventualibus ipsis post conmemorationem omnium animarum. Insuper dictum est a partibus hincinde et plene consensum, si aliquo annorum dicte refectiones neglienter obmitterentur, quod ipso facto possessiones predicte cum omnibus suis pertinentiis pleno iure cedere debeant iuri et pertinentiis sanctimonialium monasterii in Munsterlingin⁹ab ipsis perpetuo possidende. Preterea dictum est, si monasterium in Crutzlino quemquam advocatum eligere et constituere vellet ad possessiones predictas, quod tunc ipsum Johannem de Rinegge vel aliquem de suis heredibus legittimis, si ipse non fuerit, eligere debebunt omnibus aliis postpositis et dimissis. Predictis etiam additum est, quod prefate possessiones ut dictum est donate ab ipso monasterio in Crutzlino numquam debeant alienari. Visis itaque et inspectis omnibus premissis et servatis in ipsis et in quolibet premissorum verborum et gestuum sollempnitate debita et consueta, attendentes etiam predicta continere omnimodam pietatem, deliberatione competenti premissa, donationem possessionum predictarum et suarum pertinentium ac omnium eorum, que prescripta sunt, tenore presentium confirmamus et ipsis nostrum consensum expressum et legittimum inpertimur. In evidentiam etiam et robur omnium et singulorum premissorum sigillum curie Const(antiensis), quo communiter in similibus utimur, presentibus duximus appendendum. Nos etiam Hainricus divina permissione abbas¹⁰ totusque conventus monasterii in Crutzlino predicti ad observationem plenam eorum, que prescripta sunt, nos, nostrum monasterium et omnes successores nostros tenore presentium obligamus nostra sigilla etiam in certitudinem premissorum presentibus appendentes. Datum Const(antie), anno domini M°.CCC. XIX. XIII. kal. octobr. indictione secunda.

Source Fulltext: Chartularium Sangallense V, Nr. 3063, S. 361-362.