Wir Hyltbolt von gottes gnaden abbet ze sant Gallen¹ tun kunt allen den, die disen brief ho^erent lesen oder lesent, daz wir mit vnserre herren des capitels vnd conuentes gesamenotte(m) gemainem willen vnd gunst den ersamen herren hern Albreht von Castelle probst ze sant Stephans kilchen ze Costentz² vnd hern Albreht sinem brůder korherren ze Costentz³ zem tůme gelihen haben vnd lihen ze rehtem leihen in baiden vnuerschaidenlich die burg ze Nuwemberg⁴, div bi Stekboron⁵ lit, ob sie allu von vns vnd von vnserm gotzhuse ze sant Gallen leihen ist, oder den halben tail der burge oder swas von vns vnd von vnserm gotzhuse ze sant Gallen leihen ist an der selben burge, vnd daz dorf ze Mamburron⁶ mit luten vnd mit gu^etern vnd mit aller ehafti, so dar zů geho^eret, vnd den kilchensatz der kilchen ze Mamburron, die von vns leihen sint. Vnd binden vns mit des vorgenanten vnsers capitels vnd conuentes willen vnd gunst vnd vnser nachkomen dar zů, swem si baide oder der aine vnder in, ob der ander niht wa^ere, daz got niht wolle, siech oder gesunt oder in dem tôt bette die selbun burg vnd daz selbe dorf vnd den kilchensatz vnd div selben leihen, als si da vor benemmet sint, vns bittent lihen, oder bi swem si oder der aine vnder in, ob der ander niht wa^ere, da got vor si, die vorgenanten leihen vns vf sendent, oder swem si es fu^egen, machen, versetzen oder verko^vphfen wo^ellent, es sige man oder wip, den sont wir div vorgenanten leihen lihen vnd des gema^echtes, fu^egens, versetzens vnd verko^vphfens gestatton vnd vnsern willen vnd gunst dar zů tůn an allen vurtzog vnd sumenuste. Vnd ta^eten wir oder vnser nachkomen des niht, so sont div gema^echte, fu^egen, versetzen vnd verko^vphfen, als da vor geschriben stat, kraft ha^vn vnd sta^ete beliben in aller der wise, als ob es mit vnserre oder vnser nachkomen hant beschehen wa^ere, also doch, daz vns vnd vnserm gotzhuse ze sant Gallen div leihenschaft belibe. Vnd zů ainem vrkunde dirre dinge, als si da vor geschriben sta^vnt, so geben wir der vorgenante abbet Hyltbolt in baiden vnd ir iegwederm disen brief mit vnserm vnd vnsers capitels vnd conuentes des gotzhuses ze sant Gallen insigeln besigelten. Wir daz capitel vnd der conuent des gotzhuses ze sant Gallen veryehen offenlich an disem brief, daz disu leihenschaft vnd disu buntnuste vnd alles, daz da vor geschriben stat, mit vnserm willen, wissende vnd gunst beschehen ist, vnd loben vnd haben gelôpt vur vns vnd alle vnser nachkomen, daz selbe sta^ete ze habende vnd ze vollefu^ernde, als es da vor geschriben stat. Vnd zů ainem vrkunde dirre dinge so henken wir vnsers capitels vnd conuentens^a) insigel mit vnsers herren des vorgenanten abbettes insigel an disen brief. Dis beschach vnd wart dirre brief gegeben in vnserm gotzhuse ze sant Gallen, do man zalt von gottes geburte drivtzehenhundert jare, in dem nuntzehenden jar, an dem na^ehsten vritage nach sant Michahels tage des archangels.

Source Fulltext: Chartularium Sangallense V, Nr. 3064, S. 362-363.