Allen, die disen brief sehent oder horent lesen, kunden wir Johans Ro^etellein schultheitze vnd .. der rât ze Rappreswil, daz fro Katherina Heinrichs || Zimers wirtenne Heinrichs seligen Sto^eris dochter, Margareta Schubingerra V^olrichs von Egga¹ elichu wirtenna vnd Elizabeht ir swester, || der vogt Růdolf von Zollikon² ist, kamen vur vns an offen gericht vmb die ansprache, so si hatten an hern Herman pfrůder^a) ze Walde || vmb den hof ze Rikkenbach vnd vmb andru ligenden gu^eter, die an die pfrůnde ze Walde horent, vnd mit namen vmb alle rechtunge, die si von rechter erbschaft von hern V^olrich seligen wilent kilchenherren ze Walde vnd von der fro^vwen seligen von Singenberch von ligendem gůt vnd von varndem waz an gevallen, vnd saztens da offenlich vffen erber lute vnd lobten da mit ir truwen, waz si die schidlute dar vmbe hiessen vnd schieden, daz si daz stete hettin||
an var, vnd wa si dez nicht gehorsam weren vnd nicht stete wolten han, daz inen da ir recht enpfallen wer. Also wart ez lieplich vnd gu^etlich gescheiden vnd berichtet, also daz inen der vorgenande her Herman vur die vorgenanden ansprache vnd rechtunge hat geben vnd berichtet funf vnd zwentzig pfunt pfeninge Zurich muntze, dar vmb hant si sich entzigen mit dien vorgenanden ir vo^egten an dez vorgenanden schultheitzen hant, als recht ist, alr ansprach vnd alr rechtunge, so si hatten oder iemer gewinnent^b) an du vorgenanden gu^eter vnd erbschaft beide an ligendem gůt vnd an varnden keinen weg, vnd daz si noch ir erben den vorgenanden hern Herman noch kein sin nachkomen dar vmb weder an geistlichem noch an weltlichem^c) niemer besweren noch mit keinen dingen beno^eten, da mit si schaden oder kumber dulden mochten keinen weg, waz^d) ez ein entliche richtunge hat mit beider teile willen vnd gunst genomen an allen var. Vnd ze einem offen vnd gewaren vrkunde der vorgescriben dingen so geben wir dur bette der vorgenanden luten vnser burger ingesigel an disen brief. Der wart geben ze Rappreswil, do man zalt von gottes geburt druzehen hundert jar, dar nach in dem nuntzehenden jare, an dem zinstage vor sant Johans dult dez to^vffers, da ze gegen waren her Peter degan ze Go^vssowe³, her V^olr. von Matzingen⁴ frio, her Hartman kilchenherre ze Rappreswil⁵, Johans Ro^etellein, Johans Gamlenstein, Wernher von Ranbach, Heinr. der Amman, Lutolt der Junkêrre vnd ander erber lute.

Source Fulltext: Chartularium Sangallense V, Nr. 3055, S. 357.