Allen, die disen bref^a) an sehent oder ho^erent lesen, kunden wir swester Adelhaid ebtischen || vnd der conuent gemainlich ze Tennikon¹ ain erkantnust der gescriben dinge. Wissen alle, || den es ze wissenne beschiht, das wir began sun des erbern mannes hern Wernhers² von sant || Gallen vnd vro Belun³ siner wirten iargezit nach iro tôde mit aninem^b) pfunde pfenning Costencer munse, das selbe pfunt sun wir nennen von den zinsen, die ab den gu^etern gant, du er vns gegeben hât dur siner sei vnt siner wirten sei hailes willen⁴, mit solicher ordenunge. Wir sun sin iargezit began mit zehen Schillingen Costencer, der sun wir ain Schilling geben vnserm capplan, swer denne vnser capplan ist, vnd sol er im zwelf missan sprechen, dar nach sun wir mit den nun Schillingen vnserm conuent ko^vfen vber thisch, swas im allir liebost ist, vnt sol denne den vorgenanten hern Wernher vnd vro Belun beden vnser conuent swestran ieglichu ain vigilia sprechen, die selbun ordenunge son wir halten mit den andren zehen Schillingen, so siner wirten vro Belun iargezit wirt, also das aber denne vnser conuent swestran ieglichu den vorgenanten hern Wernher vnt vro Belun sprechen ain vigilia vnd vnser capplan zwelf missan. Vnd das dis war si vnt stête belibe, darumbe geben wir die vorgenemten ebtischen vnd der conuent den vorgenanten hern Wernher vnd vro Belun disen brief besigelt mit vnserm insigel ze ainem waren vrkunde allir der dinge, so da vor gescriben stât. Dirre brief wart gegeben ze Tennikon, do man zalte von gottes geburte druzehenhundert iâr, dar nach in dem nunzehenden iâre, an dem mendage vor allir hailigon tag.

Source Fulltext: Chartularium Sangallense V, Nr. 3066, S. 365-366.