Wir Hiltpolt von gotes genaden abt¹ des gotzhus von sant Gallen kvnden vnd vergiehen an disem brief allen || den, die in sehent, lesent oder ho^erent, das fur vns kamen dv erwirdigen wolgeborn frv^owe frv^o Anne grauen Huges || saeligen elich frv^owe vnd graue Friderich vnd graue Hug vnd grave Rv^odolf gebrv^oder ir svn² vnd an vnser hant vns || vf gabent die burg ze Husen³, dv burglehen ist von vns vnd vnserm gotzhus ze sant Gallen, vnd ir aigen den^a) wingarten ze dem Aichholtz⁴ vnd Kv^onen halden⁵ vnd das burgstal dar ob vnd die halden dar vnder vnd den Schleher⁶, vnd dar zv^o swas aigens da ist, das sie koften von hern Swiger dem Thummen⁷, vnd swas anders aigen da ist, das och hern Swigers des Thummen was, es sige wenig oder vil, an luten ald an gůte, gesůchtes vnd vngesůchtes, genemtes ald vngenemtes, vnd baten vns, das wir die vorgenamten burg, dv Gawans was, lihen ze burglehen vnd dv vorgenamten aigen lihen ze rechtem lehen dem ersamen ritter hern Cv^onrat von Rotenstain⁸, vnd vergiehen des, das wir durch bet der vor genamten frv^owen frv^o Annen vnd ir sune die vor geschriben burg ze Husen dem vorgenamten ritter hern Cv^onrat von Rotenstain gelihen haben ze burglehen vnd du vor genamten aigen gelihen haben ze rechtem lehen. Wir vergiehen och, das sie in vnser hant vns och vf gabent du go^eter, du hie nah geschriben stant, den zehenden ze Luchhingen⁹ halben vnd die mvli ze Bernang¹⁰, dv Muchhaims was, vnd die wise am Buningen¹¹, du och Muchhaims was, vnd dar zv^o lute vnd gůt, es sige aigen ald lehen, gesůchtes vnd vngesůchtes, genemtes vnd vngenemtes, an akkern an veld, an holtz an wasen an zwi, an wasser ald an wasser vlussen vnd an allem dem, das hern Swigers des Thummen was, vnd vergiehen och, das wir du vor genamten aigen vnd lehen gelihen haben ze rechtem lehen dem vor genamten ritter hern Cv^onrat von Rotenstain, wir vergiehen och an disem brief, das dv vor geschriben lehen erben sulen des vor geschriben hern Cv^onratz von Rotenstain tochteren als die sun, an den tail der burg ze Husen, der Gawans was, der burglehen ist, den kain tochter erben sol, vnd ist das alles besehenen, als recht, sit vnd gewonlich ist, fur alle ansprachhe gaistlichs vnd weltlichs gerichtes. Ich her Cv^onrat von Rotenstain da vor genemt vergich an disem brief, ist das, das ich ald min erben dv vorgeschriben go^eter verkoffen wellen, so sol ich ald min erben sie bieten ze koffend hern Swigers ald hern Friderichs kinden der Thummen ald hern V^olrich von Aemtz¹² vnd sinen erben ald minem herren dem abt von sant Gallen ald sinen dienstluten, went aber die dv go^eter nicht koffen, so sol ich ald min erben dv vor geschriben go^eter geben ze koffend, swem ich wil ald min erben wen, ob ich enbin, vnd sol ich vnd min erben das burglehen, das Gawans was, nieman geben ze koffend wan den, die zv^o dem koffe benemmet sint, als da vor geschriben stat. Ich her Cv^onrat von Rotenstain da vorgenemt vergich an disem brief, das ich dv go^eter aellv, dv min frv^owe frv^o Anne graven Huges saeligen elich frv^owe von Monteforti vnd ir svn grave Friderich, graue Hug, grave Rv^odolf vf gabent in mines herren hant von gotes genaden abt Hiltpoldes abt des gotzhus ze sant Gallen, dv och waren vnd die sie kofften von hern Swiger dem Thummen, sie sigen aigen ald lehen, du zv^o der^b) burg ze Husen ho^erent, vnd das burglehen ze Husen enphangen han ze rechtem lehen von minem herren abt Hiltpolt abt des gotzhus ze sant Gallen.||
Vnd vergiehen wir abt Hiltpolt da vor genemt, das wir den vorgeschriben ritter hern Cv^onrat von Rotenstain an den vor geschriben sachhen nicht irren sulen in kainen weg noch sin erben. Ich her Cv^onrat von Rotenstain da vor genemt henk min insigel an disen brief ze ainem statten vrkunde alles des, so da vor geschriben stat, vnd das ich Gawans tail^c) halben enphangen han fur recht burglehen. Dirre brief wart geben ze sant Gallen, an dem naehsten zinstag vor vnsers herren vfuerte, do du zal was von gotes geburte druzehen hundert iar vnd dar nah in dem zwainzegosten iar.

Source Fulltext: Chartularium Sangallense V, Nr. 3089, S. 386-387.