Wir graue Johans von Habspurg¹ vnd graue Wernher von Honberg² kunden vnd veriechen allen den, dien^a) disen || brief sechent oder ho^erent lesen, das wir offenlich veriechen vnd vns des erkennen an disem brief, das wir alle || die vogtei, die wir haben vber du gu^eter, du das gozhus von den Einsidellen³ an ho^erent, du gelegen sînt vserd||halb dem berge, dem man nemmet Ezzlin⁴, du von alter die herschaft von Raprectswile⁵ an horten, wir heigen sî in vnser hant oder wir heigen sî verbas vurluchen, haben von dem vorgunanden gozhus von dien Ensidellen ze rechtem lechen, als wir es von vnsern vordem, andern erberren luten vnd o^vch mit offen brieuen vernomen han. Vnd ze einem offen vrkunde dir vergicht, so geben wir graue Johans von Habspurg der vorgunande vur vns vnd den vorgunanden grauen Werhern vnsern vettern, des vogt vnd phleger wir sin, disen brief offenlich busigelt mit vnserm ingusigel. Dis buschach ze Raprectswile, do man zalte von gottes geburte druzehenhundert jar, dar nach in dem ein vnd zwenzigostem jare an dem nechsten zistag vor sant Georien dult. Ich graue Wernher von Honberg der vorgunande vergich einer offen warheit der vorguscriben dingen, vnd dar vmbe, wan ich selber eigen ingusigel ze disen ziten nicht enhan, so binde ich mich mit budachtem můte vnder das ingusigel des vorguscriben grauen Johans von Habspurg mines vetters rechten vogtes vnd o^vch phlegers. Dis buschach in der vorgunanden zal iaren vnd o^vch tages.

Source Fulltext: Chartularium Sangallense V, Nr. 3119, S. 404.