Wir Hiltpolt von gotes gnaden apt des gotzhus ze sant Gallen¹ sant Benedictes orden in Kostenzer bistv^om kunden allen, || die disen brief sehent oder ho^erent lesen, das die hochwirdigen edeln herren graue Johans von Habspurg² an eim teile vnd || grave Werenher graue Werenhers seligen sun von Honberg³ an dem andern teile mit dem edelen man hern Jacob von Wart⁴ || friien, der dem^a) vorgenanden graven Werenher ze vogt geben wart, wan er ze sinen tagen nicht komen was, offenlich vor gerichte mit gesamneter vrteilde, als recht was, da wir der vorgenande apt Hilpolt selbe ze gerichte satzen nach rechte vnd nach gewonheit vnsers gotzhus, vnd mit namen wan es mit gesamneter vrteilde an offennem gerichte^b) erteilet wart, wa ein kint, das ze sinen tagen nicht komen ist, das wir da selbe in der sache, als nach gescriben stât, dur rechte ze gerichte sitzen son, vnd geschach das mit des vorgenanden grave Johanses willen, der des selben knaben rechter vogt ist, vnd hant da die vorgenanden grave Johans vnd grave Werenher si beide ietweder dem ander ein anderen gemachet offenlich vor gerichte mit gesamneter vrteilde, als recht was, mit vnser hant gunst willen vnd ortfrumi, was si von dem vorgenandem vnserm gotzhus hant ze erbe ze lêhen vnd ze eigenschaft, vnd mit namen du lehen, du der vorgenande grave Werenher da ze mâl von vns hat enphangen. Och ist dis beschehen mit des vorgenanden her Jacobs von Wart willen vnd gunst, wan er in dirre sache des vorgenanden graven Werenhers vogt was, als vor gescriben stât, vnd mit namen mit aller der ehafti vnd sicherheit Worten vnd werchen, so man nach rechte vnd gewonheit des landes ze solichem^c) gemechte tůn sol keinen weg. Vnd das dis alles war si, dar vmbe henken wir apt Hiltpolt der vorgenande mit dem edeln herren her Jacob von Wart des vorgenanden graven Werenhers vogt in dirre sache vnser ingesigel an disen brief ze einem offen vnd warem vrkunde der vor gescriben dingen. Dis geschach vnd wart dirre brief gegeben ze Bichelnse⁵ in dem dorf, do man zalt von gottes geburte druzehen hundert jar, dar nach in dem ein vnd zwentzigosten jare, an dem samstage vor sant Laurenciien tage. Ich her Jacob von Wart friie vogt des vorgenanden graven Werenhers, wan ich im in der vorgenande sache ze vogt geben wart vor gerichte mit gesamneter vrteilde, alse recht was, vergich einer offenner warheit der vorgenanden dingen, dar vmbe henke ich min ingesigel an disen brief ze einem offen vrkunde der vorgescriben dingen, vnd geschach dis in der zal der vorgenanden jaren vnd des tages. Da ze gegen waren die erwirdigen^d) herren her Eberhart von Burgeion⁶, her V^olrich von Matzingen⁷, Lutolt von Regensperg⁸ friien, her Hartman von Baldegge, her Hartman sin sun⁹, her Růdolf von Roschach kilcherre¹⁰, her Eglolf von Rosenberg¹¹, her Burkart von Ramswâg¹², her Růdolf von Ramswag¹³, her Cůrat der schenke von Landegge¹⁴, her Johans von Munchwile¹⁵, her V^olrich der vogt von Wartense¹⁶ ritter, Heirich der Ome¹⁷ vnd ander erber lute geno^vge, die dar zu gebetten waren.

Source Fulltext: Chartularium Sangallense V, Nr. 3133, S. 412-413.