Dem erwirdigen herren von gotz genaden dem apt ze sant Gallen¹ enbieten wir her Růdolf von Hewen² ritter vnd Růdolf hern Burchartz sa^eligen von Hewen³ || svn vnsern dienst. Wir tv^ont v kvnt, daz Hiltpolt von Bichelnse vnd Walther von Bichelnse vnd Egel. von Bichelnse⁴ gebrůder vnd Johans von Lantsperg⁵ des vor || genemten Egelins vogt, der da von vogtber was, wan er noch nvt ze sinen tagen komen was, fvr vns kament vnd baten vns, das wir von in vf na^emint die || vogtye ze O^etenhusen⁶, die die vorgenemt drie brůder von vns^a) ze lehen hattont^b), do namen wir die vogtye ze O^etenhusen vf von Hiltpolt vnd von Walthern vnd o^vch von Egelin mit Johans hant von Lantsperg sines vogtz den vorgenemten. Vnd wan wir die selbun vogtye von v ze lehen habint vnd dv a^eptissen vnd dv samnung ze Ta^ennikon⁷ trost vnd gedinge hant ze vweren genaden, ob wir vnser lehen vch vf gebint, das ir dem closter ze Ta^ennikon durch got vnd o^vch dvrch des selben closters notvrft die vogtye aigentint, da uon so senden wir bi Andres von Wilberg⁸ durch got vnd durch vnser vnd vnser vordem sele hail v die vogtye vnd die lehenschaft, die wir von v an diser vogtye habint, vf ledig an disem brief vf die gedinge, das si dem vorgenemten closter ze Ta^ennikon geaigent werdi von v. O^vch sw^or der vorgenemt Egeli ainen gelerten ait ze den hailigen, das er sta^et habe, als hie vor geschriben ist von im, vnd da wider nit entv^eye mit Worten noch mit werchen, mit geriht, noch an geriht, vnd wenne er ze sinen tagen kvnt, das^c) er danne, wanne es dv denne a^eptissen zem closter ze Tennikon ist an in vorderot, besta^etet vnd volfv^ert, an geuerde mit vf gen vnd mit andren sachen nach des selben closterz notvrft sin vorgeschribenun gift, die er in vnser hant getan hat. Vnd ze ainem offen vrkvnde aller der vorgeschriben dinge so henken wir vnseru insigel an disen brief. Wir Hiltpolt, Walther, Egli vnd Johans die vorgenanten veriehen, das alles daz war ist, das hie vor von vns geschriben stat. Vnd ze ainem offen vrkvnde der^d) dinge so henken wir vnseru insigel an disen brief. Dis geschach vnd wart dirre brief geben an der mitwochun nach sant Bartholomes dult, do man zalt von gotz gebvrt druzehenhvndert jar, dar nach in dem ain vnd zwainzigostenjar.

Source Fulltext: Chartularium Sangallense V, Nr. 3135, S. 414-415.