Wir graue Dietheln von Toggenburg¹ kvnden allen, die disen brief sehent || oder ho^erent, daz fur vns kam fro Katherin Berchtoltz Wengeners wirtin vnsers || burger ze Liechtenstein² vnd da vor vns mit vnser gvnst vnd gůtem willen vnd || mit des vorgenanden Wengeners ir wirtes vnd rechten vogtes hant die nachgeschriben ir lute, die ir lehen waren von dem gotzhuse ze sant Gallen, bi dem fromen ritter hern Herman von Hvnwile³, der ovch lehen von sant Gallen hat, vf sante .. dem erwirdigen herren dem abte des gotzhuses sant Gallen vnd bat die selben nachgeschriben lute^a) lihen dem erbern ritter hern Heinriche von Hofstetten⁴ ze rechtem lehen, vnd geschach ovch dis vf senden vnd dis wider lihen, als vorgeschriben stat, mit allem rechte sitte vnd gewonheit, so dar zv^o geho^ert. Her vmbe hat dv vorgenande fro Katherin mit ir wirtes vnd vogtes hant vnd wissende von hern Heinriche von Hofstetten in kovffes wîs enpfangen achtzehen pfunt Zvricher pfenninge. Dis sint die lvte fro Hedi Egelolfs wip vsser Â⁵ vnd der kint, vnd fro Adilheit Heinr. Trachsils wip vsser  vnd der kint. Vnd hier vber ze einem waren vrkvnde, wan dis alsust vor vns geschach, so haben wir durch beider teilen bette disen brief mit vnserm insigel besigelt, vnd ich Berchtolt der vorgenande Wengener han ovch min insigel an disen brief gehenket ze einem waren vrkvnde des, so da vor von mir geschriben ist. Dis geschach ze Liechtenstein, do von Cristes geburte waren drucehen hundert jar vnd dar nach in dem ein vnd zwenzigosten jare, an dem nechsten donrstage vor sant Martis tult, da ze gegen waren her Heinr. von Sehein⁶ ritter, Berchtolt von Wittenwile⁷ vnser amman, Rv^odolfus vnser schriber, V^olrich von Kaltbrvnnen⁸, .. der kelner von Tuggen⁹, Merkli des knecht von Hofstetten vnd ander erber lute.

Source Fulltext: Chartularium Sangallense V, Nr. 3142, S. 422-423.