Wier Johans von gottes gnaden abbet dez gotzhuses ze dien Einsidellen¹ sant Benedicten ordens in Kostenzer bistům kunden allen, die disen brief sehent oder ho^erent lesen, || daz Heinrich Meiger Wernhers seligen sun dez Meigers von Kaltbrunnen² vr vns kam vnd vf gap an vnser hant ze vnsers gotzhus wegen lideklich vnd willeklich sin gůt, || daz gelegen ist vffen Ezlin³ vnd man nemmet dez Meigers gůt⁴, dc Chůnrad Nebendzwej buwet vnd erb von vnserm gotzhus ist vmb ein ierlichen zins sechs vierteil nussen, || zwei vierteil habern vnd ein schilling phenning vns vnd vnserm gotzhus da von ze gebenne ellu iar ze sant Martis mis, vnd bat der vorgenand Heinr. ez lihen mit ime vnuerscheidenlich dien erberen brůdern in dem Obern Aspe⁵, brůder Chůnrat dem Bern, brůder Peter dem Kêrer vnd Johans dem Banwart. Wier nach siner bette so han wir dc vorgenande gůt dien brůdern, so da vor genemmet ist^a), vnd ime vnd allen ir nachomen, so in dem Obern Aspe sizzet^a), mit wûnne vnd mit weide vnd mit aller der rechtunge vnd êhafti, so darzů ho^eret, vrlihen, also daz daz vorgenande gůt enheim ir lib erben oder der si von sipschaft an ho^eret an vallen noch erben sol noch ir erben, wan allein ir nachomen, die in dem Obern Aspe sizzent vnd kusches vnd go^etlich leben hant vnd gotte dienont. Wêr aber, daz si alle suntlich vnd vnerber leben v^ortin vnd sich de an dien werchen urzo^egti vnd ein gemeiner lumde dar vmbe weni vnd sich inrond eim iare von dem bo^esen leben nicht zugen vnd go^etlichs v^ortin vnd hetten, so sullen si von dem^b) vorgenanden gůte gescheiden sin vnd vnserm gotzhus geuallen. Wolton aber si sich noch denne in dem andern iare erkennen vnd in gotlich leben sich sezzen vnd v^eren in dem Obern Aspe oder anderswa, so sullen si dc gůt dennoch haben ze erbu von vnsern^a) gotzhus vnd niesen, als da vor geschriben stat. Komend aber si nicht wider inrunt dem iare an go^etlich leben, die denne lebent, so ist o^vch vnserm gotzhus de vorgenande gut alleklich lidig vnd geuallen, noch sullen si noch enmugen noch enkein ir nachome an dc gůt dehein rechtunge vordere oder ansprache han oder iemer gewinnen. Wêr aber, dc vnder inen ener oder zwene vnrecht vnd vnerber leben hette oder v^ortin, dc sol dien andern, die da recht leben hant, an dem gůt enhein schade sin. Wêr aber o^vch dc, dc die vorgenanden vieru oder swele vnder dien viren lepti, von gulte wegen old von ander redlicher sache ze ir noturft, du wol merklich ist, dc gůt vrko^vfen wolte, dc mugen si oder der eine vnder in, der noch denne lebet, wol tůn, vnd wem si ez ze cho^vfen gebent, der dez gůtes genos ist oder sin sol, dem sullen wier ez lihen ze erbe von vnserm gotzhus ze habenne vmb den zins, als da vor geschriben stat. Wellen aber wir de gůt ko^vfen, denne so si ez vrko^vfen wen, dar an sullen si vns me liben an dem ko^vfe den andren luten. Wel aber iemer nach dien vorgenanden vieren koment, die mugen dc gůt niemer vrko^vfen noch vrsezzen noch enkeinen weg vnserm gotzhus enphro^enden durch kein ir nôt, wan de si ez niezen vnd haben sun, als ez da vor geschriben stât. Wer o^vch, dc die vorgenanden viere in dem Aspe nicht mo^echtin sizzen noch beliben von vrlig oder von ander redlicher sache, swa si denne sizzend anderswa inronthalp drin mîlen vnd go^etlich leben hant vnd v^erent, so sullen si dc gůt o^vch han vnd niesen mit allem nuzze, als da vor geschriben ist. Têten si dez nicht nach der vnderschidunge, als da vor geschriben stât, so ist vns vnd vnserm gotzhuse dc gůt allekliche lidig vn^a) gevallen. Gant si o^vch alle, die denne lebent, willeklich von dem gůte oder sterbent si alle, dc si zů dem gůte nieman bestêtent, so ist ez vns vnd vnserm gotzhus alleklich lidig vnd gevallen^c) noch enhan^d) dar nach vm dc vorgenande gůt niemanne ze entwurtenne an geislichem noch an weltlichem gerichte enkein weg. Vnd dc dis als stêt belibe, so geben wir disen brief busigelt mit vnserm ingesigel. Dis beschach ze Pheffinkon⁶, da zegegen waren her Herman kilchherre ze Vrienbach⁷, her Ortolf kaplan dez abbetes von dien Einsidellen, Hartman ab dem Turne⁸ kilchherre ze Britten⁹, brůder Otto von O^etwile¹⁰ brůder ze Ruti¹¹, V^olrich Banwart, Jacob von O^etwile vnd ander erber lute genůge, do man zalte von gottes geburte druzehen hundert jar, dar nach in dem dri vnd^e) zwenzzigosten jare, an dem mentage vor aller heiligon tage, do du indictio waz du sibende.

Source Fulltext: Chartularium Sangallense V, Nr. 3196, S. 457-459.