Allen, die disen brief sehent oder ho^erent lesen, kunden wir graue Kraft von Toggemburg probst der chilchen ze Zurich, das Růdolf || Bollinger vnd Johans Snider burger ze Vtzna¹ ein zehenden ze Dietzingen², dem man spricht der Meijer zehende, gilt vier stuk || vnd ho^ert in die chilchen ze Eschibach vnd von vns lehen ist, mit vnser hant vnd gunst ze ko^vfen hant gegeben dien geistlichen erbern || herron dem abt vnd dem conuent des gotshuses ze Ruti des ordens von Premonstre vmb drissig pfunt pfenning Zurich ga^eber munze. O^vch hant V^olrich ab Egge, Kraft vnd Lutolt sins vettern sune Albrechts ab Egge³ ein zehenden ze Eschibach, der aht stuk giltet, den selben zehenden hie vor Růdolf von Zollinkon⁴ vnd .. der Lindeno^vwer von in ze lehen hatten vnd o^vch von vns lehen ist, mit vnser hant vnd gunst ze ko^vfen gegeben dien vorgnanden geistlichen herron von Ruti vnd ir gotshuse vmb sechtzig pfunt pfenning der vorgnanden munze, vnd sint o^vch die vorgeschriben von beiden zehenden der drissig vnd der sechtzig pfunde pfenninge nach ir vergiht gar gewert, vnd gaben beide zehenden lideklich vf mit allem rechte an vnser hant vnd hant sich entzigen alles des rechtes aller vorder vnd ansprache vnuerscheidenlich, so si iemer gehan mo^ehten dehein wa^eg vmb die vorgnanden zehenden vnd o^vch wider den ko^vf beide an geistlichem vnd an weltlichem gerichte, vnd durch ir aller ba^ette vnd durch die liebi, die wir ze dem gotshus von Ruti haben vnd o^vch vnser vordem hatten, die da bestattent sint, do gaben wir die vorgenanden zehenden beide mit allem rechte ze vnsern vnd ze vnser vettern wa^egen grauen Fridrichs vnd grauen Diethelms von Toggemburg, mit der willen es beschehen ist vnd mit ir gunst, dem geistlichem bescheiden man brůder Chůnrat Wisselinge dem kelner von Ruti ze der vorgnanden des .. abtes vnd des conuents wegen von Ruti vnd ir gotshuses ze rechtem eigen, das si die selben zehenden beide haben vnd niessen ewekliche. Vnd das dis war si vnd sta^ete belibe, so geben wir dien vor geschribnen herron von Ruti vnd ir gotshuse disen brief mit vnserm vnd mit der vorgnanden vnser vettern ingesigeln besigelt ze einem waren vrkund offenliche. Dis beschach ze Zurich vnd wart o^vch dirre brief gegeben, do von gottes geburt waren drizehenhundert iar, in dem vier vnd zwentzigosten iare da nach, an dem ma^entag vor sant Mathias tult eins heiligen zwelfbotten, do indictio was du sibende, da zegegen waren die erbern bescheiden herren meister V^olrich Wolfleibsch der kuster⁵, her Johans Thiie der senger der chilchen Zurich⁶, her Johans vnser kapplan, Johans von Munchwile⁷, her Johans Wolfleibsch, Heinrich von Mitlon⁸, Herman ab dem Huse⁹ vnd ander erber lute gnůge.||
Wir die vorgnanden graue Fridrich vnd graue Diethelm von Toggemburg gebrůder veriehen an disem brieue, das alles, das da vorgeschriben ist vnd vnser vetter graue Kraft getan hat, das das mit vnserre hant vnd gunst beschehen ist vnd wir es gerne sta^ete haben, vnd dar vmb henken wir vnser beider ingsigel an disen brief offenliche ze einem waren vrkund aller der vorgeschribnen rede, in dem jare vnd an dem tag, als vor geschriben ist.

Source Fulltext: Chartularium Sangallense V, Nr. 3204, S. 463-464.