Nobili viro Frederico comiti de Toggemburc¹. Presentatas nobis nuper per dilectum filium Nicholauum Mangoldi canonicum ecclesie Turicensis² nuncium tuum nobilitatis tue litteras, per quas te ad servicium dei et ecclesie matris tue magnifice et liberaliter offerebas, letanter et benigne recepimus, et que dictus nuncius pro parte tua proponere noluit^a) queve continebant predicte littere, pleno collegimus intellectu. Sane devotionem sinceram, quam ad deum et eandem ecclesiam tam per relationem eiusdem nuncii quam per litteras^b) seriem predictarum te habere percepimus, multe laudis attollimus preconiis et actionibus uberibus prosequimur gratiarum, nobilitatem eandem rogantes attentius et hortantes, quatenus in huiusmodi laudabili proposito sic solida continuatione perscistas^b), quod inde humane laudis attollaris preconiis et tandem temporali^b) et eterne mercedis premiis glorieris, sciturus quod nos loco et tempore congruis ad ea, que tui honoris et commodi respicient incrementa, proponimus intendere et oblationem tuam tanquam devoti et dilecti filii recipere, prout eiusdem ecclesie et tuis profectibus cognoverimus expedire. Datum Auinione, II. id. maii. anno octavo.

Source Fulltext: Chartularium Sangallense V, Nr. 3210, S. 468.