Wir Hiltpolt von gotes genaden apt¹ des gotzhus von sant Gallen vnd aller der conuente gemainlich || des selben gotzhus kunden vnd vergiehen allen den, die disen brief sehent, lesent oder ho^erent, das wir ain||mo^etclich mit gůtem vnd wisem rat, vnd och das es vns vnd vnserm gotzhus besser getan ist danne vermitten, vnd || durch gůte vnd danknaeme dienst, die vns vnd vnserm gotzhus tv^ot vnd getan hat vnd noch tv^on mak der erwirdig beschaiden edel man Hainrich der Ome² vnsers gotzhus dienstman, dar vmbe haben wir ime die genade tan vnd to^en mit disem brief, das wir die zwen sto^effe, die wir vnd vnser gotzhus hatten vf der hůbe ze Obern Berge³ iaerlich, du der Spiser was, dv ietzent Hainr. des Omen ist, varn lassen vnd ab dem selben gůt ab nemen also, das er vns vnd vnser gotzhus vf sinu go^eter an andern steten der selben zwai sto^effe, die wir ab gelassen haben vf dem vor geschriben gůte ze Obern Berge, bewiset vnd berichtet vnd wider geben hat gar vnd volleclich vf du nachgeschriben go^eter iaerlich ze nemend vnd ze habend, vf den zehenden ze Nider Berge⁴, der inhendes des vor genemten Hainr. des Omen ist, ainen Stoffe iaerlich vns vnd vnserm gotzhus ze nemend vnd ze niessend, vf den zehenden ze Nider Raetenberg⁵, der vor males och ainen sto^vffe iaerlich git vns vnd vnserm gotzhus, het er vns bewiset||
vnd geben den ander sto^vffe, der von der vor geschriben hůbe ze Ober Berg gie, also das wir vnd vnser gotzhus iaerlich nemen vnd haben sulen zwein sto^vffe vf dem selben||
zehenden ze Nider Raetenberg, vnd das wir vnd vnser gotzhus die vor geschriben sto^vffe deste vo^ellecliche vnd deste bas iaerlich mugen haben vnd niessen, dar vmbe so git der vor genemt Hainr. der Ome vnd hat geben vns vnd vnserm gotzhus ab der vogtyge ze Ober Raetenberg⁶ vnd ab dem gůte, das er da hat, zwai viertail kernen Bisschoffceller messes⁷, zwein Schillinge gaeber Costentzer, zwai ho^enr, das wir vnd vnser gotzhus die vor geschriben sto^vffe deste nutzlicher mugen haben vnd niessen iaerlich, als da vor geschriben stat. Vnd ze ainem waren vrkunde aller der vor geschriben dinge, das sie war sigen vnd staete beliben, dar vmbe so geben wir apt Hiltplt.^a) da vor genemt vnd der conuente disen brief besigelt mit vnserm vnd mit vnserrs^b) capitels insigel. Diz beschach vnd wart dirre brief geben ze sant Gallen, an sant Gregorien tag, do man zalt von gotes geburte druzehen hundert iar, dar nach in dem funften vnd zwainzegosten iar.

Source Fulltext: Chartularium Sangallense V, Nr. 3235, S. 481-482.