Wir apt Hilpolt von gottes gnaden des gotzhus ze sant Gallen¹ vnd dar nah das capitel gemainlich des vorgnanten gotzhus furiehint || vnd tu^egent kunt allen den, die disen gegenwrtigen brief sehent oder ho^erent lesen, das fur vns kament her Růdolf von Ramenswag, || Cůnrat vnd V^olrich sin sun² vnd hattent ze koffen geben das gůt ze Mazingen³, das das haisset des Smiz gůt, das ir reht aigen was, den || eberen^a) frowan in dem couent ze Wil⁴ vmb ain vnd zwainzig marc silbers Costencer gewigdes, vnd wan su das aigen nut geben mohton vs der gnosschaft an vnsern gunst vnd an vnser willen, da baten su vns, das wir in des gundint, do sahent wir an ir bette vnd ir dienst, die su vns hant getan vnd noch tůnt, vnd hant es getan willeclich, vnd darumb das das ganz vnd sta^et belib, darumb so gebin wir der vorgnant abt Hyltpolt vnser insigel an disen brief ze ainer merun sicherhait des da vor gescriben stat. Wir das capitel des vorgnanten gotzhus ze sant Gallen furiehint o^vch, das wir unsern herren den abt gerot hant vnd die vorgnanten von Ramenswag, also das es och vnser gůter wille ist, vnd darumb so geben wir och vnser insigel an disen brief ze henken ze ainer staten warhait des da vor gescriben stat. Wir die vorgnanten von Ramenswag furiehent och an disem brief, das wir das vorgnant gůt vf hant geben vnd furkoffet vmb das gůt, das da vor gescriben stat, des wir ganzlich gewert sint vnd an vnsern nuzze ganzlich komen ist, vnd das dis alles sta^et vnd war vnd vest belib, darumb so geben wir die vorgnanten von Rameswag alle drig ieclicher sunderlichen sin aigen insigel zů vnser herren insigel an disen brief ze henken ze ainem waren vrkund alles des da vor gescriben stat. Dis beschah vnd wart dirre brief gegeben ze Wil in dem jar, do man zalt von gottes geburte druzehenhundert jar vnd dar nah in dem funf vnd zwainzgosten jar, an vnser frowen abent ze der liehtmisse.

Source Fulltext: Chartularium Sangallense V, Nr. 3230, S. 478-479.