Dilecto filio Johanni Conradi de sancto Gallo clerico Constantiensis diocesis^a) salutem et apostolicam benedictionem^b). Laudabile testimonium, quod tibi de honestate morum et vite aliisque virtutum meritis perhibetur, rationabiliter nos inducit, ut ad personam tuam apostolice munificentie dexteram extendamus. Volentes itaque huiusmodi tuorum meritorum obtenu gratiam tibi facere specialem, beneficium ecclesiasticum cum cura vel sine cura nulli alii de iure debitum consuetum ab olim clericis secularibus assignari, cuius fructus redditus et proventus decem marcharum argenti secundum taxationem decime valorem anuum non excedant, spectans communiter vel divisim ad collationem presentationem^c) seu quamvis aliam dispositionem dilectorum filiorum .. abbatis et conventus monasterii sancti Blasii in Nigrasilua¹ ordinis sancti Benedicti Constantiensis^d) diocesis, siquod vacat ad presens vel cum vacaverit, quod tu per te vel procuratorem tuum ad hoc specialiter constitutum infra unius mensis spatium^e), postquam tibi vel eidem procuratori vacatio illius innotuerit, duxeris acceptandum, conferendum tibi post acceptationem huiusmodi cum omnibus iuribus et pertinentiis suis donationi apostolice reservamus, districtius inhibentes eisdem abbati et conventui, ne de beneficio huiusmodi^f) interim etiam ante acceptationem eandem, nisi postquam eis constiterit, quod tu vel procurator predictus illud nolueritis^g) acceptare, disponere quoquomodo presumant, ac decernentes ex nunc irritum et inane, si secus super hiis a quoquam quavis auctoritate scienter vel ignoranter contigerit attemptari, non obstantibus, si aliqui super provisionibus faciendis de huiusmodi vel aliis beneficiis ecclesiasticis in illis partibus^h) speciales vel generales nostras vel predecessorum nostrorum Romanorum pontificium aut legatorum sedis apostolice litteras impetrarint, etiam si per eas ad inhibitionem reservationem et decretum vel aliter quomodolibet sit processum, quibus omnibus preterquam auctoritate nostra huiusmodi beneficia expectantibus te in in ipsius beneficii assecutione volumus anteferri, sed nullum per hoc eis quo ad assecutionem aliorum beneficiorum preiudicium generari, seu si eisdem abbati et conventui vel quibusvis aliis communiter vel divisim ab eadem sit sede indultum, quod ad receptionem vel provisionem alicuius minime teneantur et ad id compelli non possitⁱ⁾, quoque de huiusmodi vel aliis beneficiis ecclesiasticis ad eorum collationem presentationem vel quamcunque aliam dispositionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem et qualibet alias dicte sedis indulgentia generali vel speciali, cuiuscunque tenoris existat, per quam presentibus non expressam vel totaliter non insertam effectus huiusmodi nostre gratie impedri valeat quomodolibet vel differri, et de qua cuiusque toto tenore habenda sit in nostris litteris mentio specialis. Nulli ergo^k) etc. nostre reservationis inhibitionis et constitutionis^l) etc. Dat. Auinione, IIII. kl. iulii, pontificatus nostri^m) anno nono.||
In eundem modum dilectis filiis .. preposito Solodorensis² Lausanensis³ diocesis et .. thesaurario ac .. cantori Basiliensis⁴ ecclesiarum salutem et apostolicam benedictionem^b). Laudabile testimonium etc. usque mentio specialis. Quocirca discretioni vestre per apostolica scriptaⁿ⁾ mandamus, quatenus vos vel duo aut unus vestrum per vos vel alium seu alios huiusmodi beneficium per nos ut premittitur reservatum, si tempore huiusmodi nostre reservationis vacabat vel extunc vacavit aut cum illud vacare contigerit, eidem Johanni vel procuratori suo^o) eius nomine post acceptationem predictam cum omnibus iuribus et pertinentiis suis auctoritate nostra conferre et assignare curetis, inducentes eum vel dictum procuratorem pro eo in corporalem possessionem huiusmodi beneficii ac iurium et pertinentiarum ipsius et defendentes inductum sibique facientes de ipsius beneficii fructibus redditibus proventibus iuribus et obentionibus^p) universis integre responderi, non obstantibus omnibus supradictis seu si eisdem abbati et conventui vel quibusvis aliis communiter vel divisim a prefata sede indultum existat, quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum^q) de indulto huiusmodi mentionem, contradictores per censuram ecclesiasticam^r) appellatione postposita compescendo. Dat. ut supra.

Source Fulltext: Chartularium Sangallense V, Nr. 3254, S. 496-498.