Wir Hiltpolt von gotz genaden abbt des gotzhus ze sant Gallen¹ vnd aller conuent gemeinlich desselben gotzhus kundent vnd verjehen alle den, so disen brieff lesend oder ho^erend lesen, das wir angsechen haben dankneme vnd getruwe nutz vnd gůt dienst, die vns vnd vnserm gotzhus tůt vnd getan hatt vnd noch tůn mag der bescheiden edel man Heinrich der Ome² vnser diener vnd vnsers gotzhus dienstman, dar vmb so tůnd wir im die gnad vnd haben getan willenclich frilich vnd einmu^etiklich, das wir alle die eigenschafft vnd die recht, die wir ald vnser gotzhus hatten alder haben mochten an den hoff ze Oberberg ze^a) dem Frygen Dorff³, der desselben Heinrich des Omen recht lehen was von vnserm gotzhus vnd er denselben hoff kouffet vmb Růd. den Spiser, geben vnd geben haben mit disem brieff dem spital der durfftigen in der satt ze sant Gallen⁴, das der selb spital denselben hoff sol han jemer me eigenlich, ân alle ansprach vnd ân alle irretag^b), die von vns als vnsern nachkomen mo^echt beschechen, vnd enzhen vns vnd alle vnser nachkomen mit disem brieff aller ansprach vnd aller recht, die wir an dem vorgenempten hof ze Berg^c) ze dem Frygen Dorff hatten ald haben mochten mit keinen dingen, won der vorgenempt Heinr. der Ôme den vorgeschriben hoff ze Oberberg dem vorgenempten spital durch siner sele willen diemu^etiklich vnd willenklich geben hat. Vnd das dis alles ware sig vnd sta^et belib, dar vmbe so geben wir abbt Hiltpolt vnd ouch aller conuent da vorgenemt disen brieff besigelt mit vnserm insigel vnd mit vnsers capitels insigel, die bedi daran hangend. Dis beschach vnd ward diser brieff geben ze sant Gallen an sant Vrbans tag, do man zalt von gotz geburt drutzechenhundert jar vnd darnach in dem funff vnd zwaintzigosten jare.

Source Fulltext: Chartularium Sangallense V, Nr. 3250, S. 494-495.