In nomine domini amen. Officialis curie Const(anciensis) omnibus presencium inspectoribus salutem cum noticia subscriptorum. In causa mota coram || nobis inter .. abbatissam et conventum monasterii Thuricensis¹ ex una et Jacobum Marscalci de Raprehswille² ex parte || altera super eo, quod .. abbatissa et conventus predicti coram nobis proposuerunt, quod licet ipsi fuerint in possessione pacifica et quie||ta silve dicte Wassenberg³, predictus tamen reus silvam ipsam contra iusticiam sibi usurparet et occuparet, hominesque dicti monasterii ac famulos volentes ibidem ligna secare, sicut hactenus fecerunt, prohibuerit et instrumentis, quibus ligna secare voluerunt, temere spoliaverit, petentes a nobis dictum Jacobum conpelli ad dimittendum ipsos actores dicta silva uti, quemadmodum hactenus usi fuissent, sicut hec et alia in libello super hoc edito plenius continentur, lite legitime contestata prestitoque iuramento calumpnie et veritatis dicende a partibus antedictis, receptis eciam testibus iuratis, quos utraque pars pro suis intencionibus fundandis producere voluit et produxit, ipsorumque dictis in scriptis redactis publicatis et cum diligencia visis et perspectis conclusoque in negocio, assignato eciam termino videlicet feria sexta ante festum purificacionis gloriose virginis Marie dictis partibus ad audiendum sentenciam nostram diffinitivam in ipsa causa, eodemque termino causa uberioris deliberacionis usque ad feriam quintam post dominicam, qua cantabatur Oculi, proximam et demum usque in crastinum continuato ac dictis partibus eodem termino nostram sentenciam diffinitivam cum instancia postulantibus, quia invenimus ex hiis, que coram nobis in iudicium sunt deducta, .. abbatissam et conventum predictos sufficienter probasse, ipsos, monasterium suum et homines ipsius monasterii residentes in hůbis dictis des Hůbers hůbe et Bislachhůbe⁴ fuisse in quieta et pacifica possessione secandi ligna in nemore Wassenberg ad usum ipsorum ipsumque monasterium et dictos homines prohibitos fuisse, ne in nemore predicto ligna secarent, per ipsum reum, habito peritorum consilio iurisque ordine in omnibus observato diffinitive pronunciamus, reum cessare debere a prohibicione sua predicta et dimittere .. abbatissam et conventum, monasterium ipsum et ipsius homines ligna secare in dicto nemore ad usum ipsorum, reducentes ipsum monasterium et homines suos predictos in possessionem, quam habuerunt ante prohibicionem rei predictam, in nomine domini in hiis scriptis, salva questione dominii partibus hincinde super nemore predicto. Reservamus eciam expensas litis .. abbatisse et conventui predictis, quas nostra taxacione prehabita suo obtinuerint sacramento. Datum Const(ancie) anno domini millesimo CCC°. vigesimo sexto, feria sexta post dominicam, qua cantabatur Oculi, ind. nona.

Source Fulltext: Chartularium Sangallense V, Nr. 3278, S. 511-512.