Wir Růdolf von gotz genaden bischof ze Costentz¹ tu^egen kunt allen den, die disen brief || ansehent lesent alder ho^erent lesen, das die erberen manne Wilhalm vnd Berhtolt gebrůder von || Staina² vnser vnd vnsers gotzhus von Costentz dienstlute fur vns kament ze Arbon³, da wir ze || geriht sazsent, vnd gabent vf willeclich vnd ane alle betwngnust vnd als inen muglich waz ze tu^ende nah der vrtaild vnd inen vor vns geuiel vnd ertailt wart, halbtail des nidern wingarten ze Oberstaina⁴, der gelegen ist bi dem wazser ze Stainah⁵, der ir reht aigen was, vnd batent vns flehlich, daz wir das halbtail des vorgenanden wingarten verlihent ze ainem rehten lehen dem erbern manne Cůnrat Arnolt burger ze sant Gallen. Vnd wan wir alleweg reht vnd gewonlich bet erho^eren so^elin, vnd allermaist gen den, die vns vnd vnserm gotzhus dienstber sint, da von durh beth der vorgenanten vnser dienstlute haben wir mit vnser hant verlihen vnd verlihent an disem brief halbetail des vorgeschriben wingarten dem||
vorbenemten Cůnrat Arnolt burger ze sant Gallen mit zunen⁶, mit rehten vnd mit gewonhait, die zů dem halbtail des vorgescriben wingarten geho^erent, vnd ist daz alles beschehen mit Worten vnd mit werken, du darzů notdurftig warent, vnd ze ainem waren vnd sta^eten vrkunde aller der vorgescriben dinge han wir vnser insigel gehenket an disen brief. Der wart geben ze Arbon in dem jare, do man zalte von Christes geburt drucehenhundert iar, sehs vnd zwaintzig iar, an aller hailigen tag.

Source Fulltext: Chartularium Sangallense V, Nr. 3296, S. 523.