Allen dien, die disen brief sehent oder ho^erent lesen, kúnde ich Johans der Schnider¹ wîrt vnd burger ze Vtzna², daz Hainrich || der Biber von Goldelingen³ den gaistlichen lúten dem . . abt vnd dem conuent dez gotzhusez ze Rv´ti⁴ gegeben hât dûr siner sele || hail willen vnd siner vorder mit minem gûnst vnd willen den zehenden, der da lît vf Ôrn⁵ vnd giltet zwai stûk kornez, der von || mir lehen ist. Vnd von der gûnst vnd liebi, so ich ze den selben gaistlichen lúten vnd ze îr gotzhuse han gehebt vnd noch hân, so hân ich den selben zehenden verlúhen H. Siglins seligen svˆn vnd Rv^o. dem Lehman von Verrich⁶ ir gotzhusez aigenen mannen, die sú vúr mich brachten in ze enpfahenne, vnd binde o^vch mich dar zů vnd alle min nachkomen, ane alle geverde den vôrgeschribenn zehenden ane alle widerrede vnd vúrzug ze lihenne dien, die sú vúr mich bringent vnd antwúrtent alder vúr mîn nachkomen, den selben zehenden ze enpfahende nâch der tôt, die in ê gehebt hant, also sô îr ainer stirbet, die den zehenden gehebt hant, daz ich in aime andern an dez stât lihe, vnd ob sú baide sterbent, daz ich in zwain andren an der stat lihe, die si vúr v´ns bringent. Swenne aber ainer alder beide den vorgenanden zehenden von mîr alder von minen nachkomen enpfahent, so súln sú mir alder minen nachkomen geben ain halbez pfunt pfefferz vnd ensol ich noch enhain min nachkome enhain ansprâch noch vorderung offenlich noch hainlich an gaistlichem noch an weidlichem gerichte vúrbaz an sú hân. Vnd daz diz wâr vnd stêt belibe vnd ane krank, so gib ich den vorgeschribenen gaistlichen lúten dem . . abt vnd dem conuent disen gegenwirtigen brief besigelt mit minem insigel. Diz beschach vnd dirre brief wârt gegeben, do man zalt von gotez gebúrt drúzehen hundert jâr, dar nach in dem acht vnd zwaintzigosten jâr, an dem nehstem mêntag nach dem ersten sunnetag brachkotz.

Source Fulltext: Chartularium Sangallense VI, Nr. 3353, S. 40-41.