Rudolfo episcopo Constanciensi administratori monasterii sancti Galli¹ ordinis sancti Benedicti tue diocesis auctoritate apostolica in spiritualibus et temporalibus deputato. Iniunctum nobis desuper apostolatus officium, quo universalis cura ecclesiarum et monasteriorum omnium nobis incumbere noscitur, instanti solicitudine nos perurget, ut indempnitatibus ipsorum, que propriis carent pastoribus, providere paterna diligencia studeamus. Cum itaque monasterium sancti Galli ordinis sancti Benedicti tue Constanciensis diocesis, in quo nuper electio per dilectos filios . . conventum ipsius monasterii fuisse dicitur in discordia celebrata², vacare per obitum quondam Hitpoldi abbatis³ ipsius noscitur ad presens, nos attendentes, quod monasterium ipsum predicte occasione discordie varia posset incurrere presertim vigente presentis temporis malicia, nisi provideretur aliter, detrimenta, eiusdem monasterii, cuius provisionem ex hiis et aliis certis causis rationabilibus, que ad id nostrum induxerunt animum, nobis et apostolice sedi nuper duximus hac vice specialiter reservandam, decernentes extunc irritum et inane, si secus per quoscunque quavis auctoritate scienter vel ignoranter contingeret super hiis attemptari, huiusmodi precavere periculis cupientes et considerantes insuper, quod per tuam diligenciam providam ab adversis et noxiis, que carencia pastoris consuevit ecclesiis et monasteriis inducere prelibatoque monasterio presentis temporis comminatur malitia, poterit utiliter auctore domino preservari, curam et administrationem plenam generalem et liberam prefati monasterii omniumque iurium et pertinenciarum ipsius in spiritualibus et temporalibus gerendas a te seu de mandato tuo per alium vel alios tuo nomine, quousque aliter super hoc duxerimus ordinandum, fraternitati tue presencium auctoritate conmittimus, ordinandi statuendi reformandi faciendi gerendi et plenarie in spiritualibus et temporalibus exercendi omnia et singula, que ad liberam administrationem et bonum statum eiusdem monasterii ac iurium et pertinenciarum predictorum pertinere noscuntur, contradictores quoque quoslibet et rebelles per censuram ecclesiasticam appellatione postposita compescendi, alienatione tamen bonorum inmobilium ipsius monasterii tibi penitus interdicta, facultatem tibi plenam et liberam concedentes. Sic itaque curam et administrationem huiusmodi gerere studeas solicite fideliter et prudenter circa recuperationem et defensionem iurium eiusdem monasterii studium attente solicitudinis adhibendo, quod a retributore bonorum omnium retributionis eterne assequi premium merearis nosque^a) tuam debeamus in domino diligenciam propter hoc merito comendare. Dat. XV. kl. maii, anno quartodecimo.

Source Fulltext: Chartularium Sangallense VI, Nr. 3405, S. 73-74.