Ottoni duci Austrie¹. Binas nobilitatis tue litteras benigne recepimus noviter nobis missas, per quarum alteram instanter et humiliter supplicabas, quod cum monasterium sancti Galli Constanciensis diocesis vacans ad presens² fortissima castra et fortalicia habeat, ad que occupanda nonnulli vicini nobiles Ludouico de Bauaria heretico et scismatico noviter adherentes cum eiusdem Ludouici favore aspirant, et ex occupatione huiusmodi, si quod absit subsequeretur, tam venerabili fratri nostro Rudolphe episcopo Constanciensi³ quam aliis earum parcium nostris et ecclesie fidelibus et devotis scandalosa pericula pervenirent, administrationem generalem eiusdem monasterii prefato episcopo, per quem iura ipsius deffensari ac castra et fortalicia predicta tueri commodius poterunt, committere dignaremur, cui quidem supplicationi duximus, sicut in nostris inde confectis plenius continetur litteris⁴, annuendum. Alia vero littera continebat, qualiter litteris nostris, quas pridem per dilectum filium Vlricum de ordine Heremitarum sancti Augustini penitenciarium nostrum et . . comendatorem provincialem in Alsacia⁵ tibi destinavimus receptis et intellectis, que continebantur in eis, tu prudenter attendens, quod negocio, de quo agebatur in eis, expediebat necessario, quod cum dilecto filio nobili viro Alberto duce Austrie⁶ germano tuo, ut melius et utilius procederet, tractaretur, ad eum tuos celeres nuncios super hoc destinaras et ad conveniendum cum venerabilibus fratribus nostris Argentinensi⁷ et Constanciensi episcopis certum duxeras terminum statuendum, intendens, quod inter te ac dictum germanum necnon memoratos episcopos ordinata super predictis extiterint, nobis scripturis et nunciis celeriter nunciare. Nos itaque contentis in tuis litteris intellectis tuam in hac parte providenciam multipliciter in domino commendantes eam sicut alias rogamus et hortamur attente, quatenus devotionis tue dudum oblatam nobis et ecclesie sancte dei constanciam conservando, in eis persistere indefesso studio et animo intrepido non ommittas, tibique a falsis suggestionibus aliquorum, qui tue forsan salutis et libertatis emuli eiusdem L. heretici et scismatici te libenter servituti adicerent, studeas sedule precavere, nec non qualiter adherentibus sibi in Lombardie partibus successerit, de quibus quasi nullus remansit, qui vel interfectus non fuerit aut depressus et gravatus multipliciter, ad memoriam reducendo ipsius fraudulosis promissionibus, qui nichil nisi de alieno valet promittere, cum suis exigentibus demeritis bonis omnibus et honoribus exigente iusticia sit privatus, obtures nichilominus aures tuas nec paciaris gravibus penis et sentenciis, quas adherentes eidem ipso facto noscuntur incurrere, te involvi. Speramus equidem in eo, qui solus magna facit et inscrutabilia, quod sic tibi assistet eius dextera, si sibi constanter adheseris in hac parte, quod non solum conatus eiusdem heretici et scismatici reprimentur adversi, sed ipsum sua increpabit adversio et in sua perversitate defficiet, cum impium in sua malicia digna dei censura subvertet, assistente tibi nichilominus ac aliis fidelibus in premissis matre tua ecclesia consiliis et auxiliis oportunis. Ut autem de hiis, que dilectus filius nobilis vir Henricus comes Palatinus Reni dux Bauarie⁸ noviter nobis scripsit, noticiam habeas pleniorem, ecce quod tenorem litterarum ipsius indicabit tibi cedula presentibus interclusa. Ceterum de hiis, que inter te dictum que germanum tuum et episcopos memoratos ordinata^a) in hac parte fuerint, nos studeas, quamtocius commode poteris, efficere, sicut te facturum per tuas predictas obtulisti litteras, certiores. Dat. Auinione, XIIII. kl. maii, anno quartodecimo.

Source Fulltext: Chartularium Sangallense VI, Nr. 3407, S. 74-76.