Allen den, die disen brief sehent oder ho^erent lesen, kúnden vnd veriehen wir Amelîa von Horwen¹ a^epti||schenne vnd gemainlich aller der conuent dez gotzhus ze Maggeno^vwe gelegen in Kostentzer bistům, daz V^olrich || sa^elig von Husen vnd Hainrich sin sun burger ze Bischofcelle v´ns vnd v´nseren^a) vorderen vnd o^vch v´n||serem closter gu^etelich vnd manigen nutzberen dienst getan hant, vnd sunderbar daz si v´nserem closter gefu^eget hânt vnd geben den kornza^ehenden ze Sorental, der iro was, vnd ir gůt, daz si ze Oberndorf hattent, also daz v´ns vnd v´nserem kloster dú gu^eter dienen son nach swester Margaretun vnd swester Elizabeth dez vorgenanten V^olrichs sa^eligen tohtran v´nser closter frowan tôde vnd wesen, vnd ze ainer widerlegung der vorgeschribenen dienst vnd gu^etlichi so binden wir v´ns vnd v´nser nahkomen vnd v´nser closter, daz wir nach der vorgenanten swestran Margaretun vnd Elizabeth tôde iemer me begangen vnd begân súlen an sant Nicolaus âbent dez vorgedahten V^olrichs seligen iârgetzît mit singend vnd mit lesenne, als sitte vnd gwonlich ist in v´nserem closter, vnd zehen schilling pfenning Kostentzer múnz des tages an ainen dienst ze bekerende v´nserem conuent an win ald an vischen ald baiden, als ez danne notdúrftig ist daz mâl ze besserende mit den selben zehen schillingen dem conuent. Vnd daz wir vnd v´nser nahkomen niemer da wider komen vnd daz iargetzît versûmen ze bega^ende vnd den dienst v´bersehent, wan wâ wir ald v´nser nachkomen daz v´bersa^essen, wir ervolltientz danne vnd begangen daz jârgetzît aintweder in der wuchun vor sant Nicolaus tag ald ainer wuchun dar nach, so son dú êgenanten gu^eter lideklich von v´ns vnd v´nserm kloster vallen vnd an den spitâl in der statte ze Kostentz dannan hin^b) ho^eren vnd vallen, der o^vch danne iemerme dú gu^eter niessen vnd haben sol, als wir si solten hân gebet vnd genossen, âne alle v´nser vnd v´nserre nâhkomen wider rede vnd fúrz|g, alsô daz wir noch v´nser nâhkomen den spital noch sin pfleger niemer ierren noch gesûmen súlen an den vorgenanten gu^etern, wan wir die pên willeklich an v´ns vnd v´nser nahkomen genomen haben. Vnd ze ainer sicherhait aller der vorgeschribenen dinge vnd offener warhait so henken wir die vorgenanten a^eptischenne vnd der conuent v´nserr a^ebtischenne insigel der êgenanten fúr v´ns vnd v´nsern conuent an disen brief. Der brief wart geben in v´nserem kloster ze Maggeno^vwe in dem jar, do man zalt von gotz gebúrt drúzehenhundert jar vnd dar nah in dem drîssegesten jar an sant Cůnratz tag.

Source Fulltext: Chartularium Sangallense VI, Nr. 3439, S. 102-103.