Wir graf Rudolf von Hohenberch¹ vnd wir graf Berchtolde von Grayspach von Marsteten von Nyffen genant² vnd wir graf || Vlrich von Pfannenberch³ vnd ich Johans druchsetze von Dyezzenhouen⁴, Heinrich von Gumpenperg⁵, Johans druchsetze von Waltpurg⁶ vnd || Heinrich der Preisinger von Wollentsach⁷ veriehen vnd geben ze bechennen offennlich an disem brief allen den, die in ansehent, lesent oder || hôrent lesen, daz wir von vollem gewalt, den wir von dem durchleuchtigen vnserm gnedigem herren cheiser Ludwigen von Rôm an ainem tail vnd dem hochgebornen fursten hertzog Otten ze Osterr.⁸ vnd ze Styr an dem andern tail haben vmb di pfantschaft Zurich vnd sand Gallen, di der vorgenant hertzog Ott. noch von dem vorgenanten vnserm herren cheiser Lud. vnausgerichtte ist, ausgesprochen haben vnd sprechen an disem brief, daz vnser liber herre cheiser Ludowig von Rom mit samt vnserm herren dem egenanten hertzog Ott. ze Osterr. vnd ze Styr nv auf sand Waltpurgen tag, der schierst chumt, mit ir selbers leib fur Zurich vnd sand Gallen zogen sullen, also daz si daz mit ir paider macht dwingen sullen, vnd daz ez denne der cheiser dem vorgenanten hertzog Ott. oder sinem bruder hertzog Albreht.⁹ oder sinen chinden in antwurtten sol an furzuch. Wer aber, daz in dez ander sache irreten oder daz er sein niht tůn wolt, an leibes not alein, sol^a) sol der cheiser dem obgenanten hertzog Ott. oder sinem bruder oder chinden fúr di vorgenanten pfant auf den vorgenanten sand Waltpurgen tag in antwrtten Brisach¹⁰ purg vnd stat vnd Mulhusen¹¹ oder Nevnburch¹² dar zvˆ ir aintweders. Ob aber di selben stet dez auch wolten wider sein vnd sein niht tůn, so sullen di vorgenanten siben auf ir ayde denne vber ain chomen, waz der cheiser dem hertzogen tůn sulle fur daz, vnd daz im di vorgenanten sinev pfant gentzlich werden ausgerichttet. Wer aber, daz im di vorgenanten stet Brisach vnd Mulhusen oder Nevnburch dar zvˆ in geantwrtte wurden, so sol er dannoch dem cheiser beholfen sin auf di von Zurich vnd sand Gallen, ainen weg als den andern. Vnd daz disev sache volfůret werde vnd stet behalten werde, als vorgeschriben stat, dar vmb so geben wir di vorgenanten siben disen brief ze einem vrchund versigelten vnder dez vorgenanten graf Rudolfs von Hohenberch hangendem insigel. Der ist geben ze Auspurch, an mentag nach sand Katerinen tag, do man zalt von Christes geburde drevzehen hundert iar, in dem dreizzigstem iar.

Source Fulltext: Chartularium Sangallense VI, Nr. 3438, S. 101-102.