Wir Růdolf von gots gnaden byschof ze Chostentz vnd gemainer phleger an gaistlichen vnd weltlichen sachen dez gotzhuss ze sant Gallen¹ vnd wir der conuent gemainlichen dez selben gotzhuss ze sant Gallen tůn kunt vnd veriechent offenlich an disem brief allen den, die in an sehent ald ho^erent lesen, daz wir durch die liebi vnd frúntschaft, die der êrwirdig herre bischof Cůnr. von Frisingen² v´ns vnd v´nserm gotzhus ze sant Gallen hat erzaiget vnd getan an dem zil, so er v´ns vnd v´nserm gotzhus ze sant Gallen hat geben von den na^echsten winachten v^eber vier jar, v´nserm hof ze Stamhain³ vnd lút vnd gůt vnd mit dem kilichen satze ze Stamhain, der dar in geho^eret, mu^egen wider kovffen in den selben vier iaren, wenne wir wellent,vmb zway húndert vnd vierzich mark silbers Costentzer gewa^eges⁴. Vnd vmb die liebi vnd fru^entschaft, die er v´ns getan hat vnd erzaiget mit dem zil vnd mit dem wider kovffe, dar vmb so haben wir dem chloster ze v´nser Frowen Celle, daz da lit by Kalcharn⁵, sant Bernhartz ordens, daz der selb herre bischof Cůnr. von Frisingen gebo|wen vnd gestifet^a) hat, geben vnd haben geben div aigenschaft dez hofs ze Ha^erdern⁶ vnd dez kilchensatz ze Ha^erdern, der in den selben hof geho^ert, derselb hof fúnf schilling Costentzer phenninge giltet, mit allem dem rechten, so wir vnd v´nser gotzhus ze sant Gallen dar an haben vnd gehaben mu^egen. Vnd verzihen v´ns fu^er v´ns vnd fu^er alle v´nser nachko^vmen der a^eigenschaft gar vnd ga^entzlichen dez hofs vnd kilchensatzes ze Ha^erdern, der in den hof geho^ert, vnd alles dez rechtes, daz wir vnd v´nser gotzhus ze sant Gallen dar zů haben vnd haben mu^egen, also das wir noch kain v´nser nachko^vme daz vorgenant chloster vnser Frowen Celle dar an nicht beswa^ern su^ellen noch irren mit gericht noch an gricht noch enhainen weg. Wir haben ovch verhaissen vnd gelobt mit gůten trúwen dem vorbenemten chloster vnser Frowen Celle vnd dem bischof von Frisingen, wa daz chloster zwo mark geltes kovffet, die von v´ns vnd von v´nserm gotzhus ze sant Gallen lehen sint, der aigenschaft v´nsers gotzhus von sant Gallen sint, da weder vestinan noch kilchensatz noch ehafti noch twing noch bân in ho^erent, die selben^b) zwo mark geltes su^ellen wir dem chloster aigenne vnd^c) div aigenschaft geben an allen fu^erzug vnd widerred, vnd dar vmb geben vnser vnd vnsers couentes brief, der daz verbenemt^a) chloster ze v´nser Frowen Celle notdúrftig ist von dem gotzhus vnd von dem conuent von sant Gallen, fv^er v´ns vnd fv^er alle v´nser nachkomen. Vnd ze ainem vrkunde vnd warhait aller der dinge, so hie vor geschriben stat, haben wir in disen brief geben versigelt mit v´nserr phlegnu^esse von sant Gallen vnd mit vnsers conuents von sant Gallen insigeln. Wir Růdolf der ebenemt byschof von Costentz veriechen als ain bischof von Costentz, alles daz hie vor geschriben stat an disem brief, ez si geschechen ald ez su^elle noch geschechen, daz das alles geschehen ist mit vnser gunst vnd sta^etigung vnd gůtem willen, vnd haben daz getan vnd verhenget vnd besta^ett, dar vmb daz v´ns duchte, daz ez dem gotzhus von sant Gallen nu^etze vnd gůt vnd^d) notdu^erftig was. Vnd ze ainem vrku^ende haben wir v´nsers bystůms insigel zů v´nserr phlegnu^esse vnd des conuents von sant Gallen insigeln gehenket^e) an disem^a) brief. Der brief ist geben, do man zalt von Christes geburt drúzehen hundert jâr vnd darnach in dem ain vnd drissigisten jâr, an sant Thomas tag.

Source Fulltext: Chartularium Sangallense VI, Nr. 3478, S. 131-132.